منتديات زيدل

منتديات زيدل (http://www.zaidal.com/229/index.php)
-   المركز الثقافي العربي بزيدل (http://www.zaidal.com/229/forumdisplay.php?f=62)
-   -   الأصبوحة الشعرية بمناسبة ذكرى أداء القسم (http://www.zaidal.com/229/showthread.php?t=18220)

Elie Swed 9th July 2015 06:34 PM

الأصبوحة الشعرية بمناسبة ذكرى أداء القسم
 
2 مرفق
بمناسبة ذكرى أداء القسم للسيد الدكتور الرئيس بشار الأسد

قامت الوحدة النسائية في زيدل برئاسة السيدة نجاة طحان

وبالتعاون مع المركز الثـقافي العربي بزيدل

بإقامة أصبوحة شعرية وفقاً لـ الأعلان المبين أدناه :

الملف المرفق 8787

ساعدت في التوثيق (( السيدة صفاء بشارة ))

الملف المرفق 8786

نتابع معكم الأصبوحة


الإدارة 9th July 2015 07:14 PM

المقدمة :
 
4 مرفق
الأصبوحة الشعرية

بمناسبة ذكرى أداء القسم

للسيد الرئيس بشار الأسد

والتي أحياها كل من السادة الشعراء

وحسب تسلسل الظهور :

1 ـ الشاعر الأستاذ زياد سطاح .

الملف المرفق 8793

2 ـ الشاعر الدكتور ماجد سطاح .

الملف المرفق 8794


3 الشاعرة السيدة عبير ديب .

الملف المرفق 8796


في تمام الساعة الحادية عشر صباح يوم الخميس الواقع في 9 / 7 / 2015 بدأت الأصبوحة الشعرية بوجود لفيف من الحضور الكريم المميز فعلاً بوجود كريم لسيدات شركة حمص لتصنيع العنب بحيث افتتح الحدث الثقافي السيدة نجاة طحان رئيسة الوحدة النسائية بزيدل وقوفاً لدقيقة صمت أمام هيبة شهداء سورية وتقديراً لتضحياتهم الكبيرة. حيث رحبت بالحضور متمنية لهم أصبوحة جميلة مع الشعراء . وقدمت الشاعر الأستاذ زياد سطاح متمنية عليه التفضل وإلقاء قصائده الرائعة على الحضور :



مقدمة الأصبوحة السيدة نجاة طحان :

الملف المرفق 8795

الإدارة 9th July 2015 07:18 PM

الشاعر زياد سطاح :
 
1 مرفق
الشاعر الأستاذ زياد سطاح

الملف المرفق 8797

بـ ْهالظرف الإستثنائي
جايي بـشِعري و أدائي
تا لبّي دعوة جمهور
الاتّـحـاد الـنـســـائي
----------------
1 ـ (( أرض القداسة )) :

يجتاحني شوق ٌ يؤرّق خاطري
للعيش في وطن ٍ بلا أشجان ِ

وأتوقُ للبنيان, تلك رسـالتي
فأنا ابن شعب ٍ للحضارة بان ِ

وأنا ابنُ أرض ٍ للقداسة موئلٌ
للتين والـزيتون والإنـسان ِ

وأنا شــآمي ُ الدّيانة والهوى
إنَّ الشّــآمَ لقِـبلة الأديان ِ.

ويشدّني عبقُ السّنين بعطره
كمجامر البخّور ِ, كالقـربان ِ

أيّامَ قد طاع َ الزّمانُ لأمرنا
أسياد قوم ٍ, سـادة ُ الأوطان ِ

تشرين يشهد, ميسلونُ وغوطةٌ
شـمّاءَ أسكَرَها الزّكيُّ القاني :

أنّا دعاة ٌ للسـلام إذا اقتضى
منّا سـلام الحقِّ والشّجعان ِ

وبأننا أهل البسـالة والوغى
لا نرتضي عيشا ً بطعم هَوان ِ.

واليومَ وَسوسَ في الصّدور مُتاجرٌ
كالـسّوس ينخـر باسـق الأفنان ِ

كرمى لأنصاف الرّجال و حقدهم
قـد جاءنا القاصي وجـاء الدّاني

لم يعلموا أنّا أســـود عقيدة ٍ
و رجاءنا بالله, لـيــس بِثان ِ

وسلاحنا صبرٌ وصلب عزيمة ٍ
مهما تمادت موجة الأحزان ِ

لكنَّ بي وَجَع ٌ يحزّ ُ بخافقي
إذ ْ بِتّ ُ من جَور الشّقيق أعاني

*********

2 ـ (( الشعب يريد )) :

لو تعرفوهالشعب شو بدّو
كنتو بعد أكثر بتحتدّو

الشعب بدّو البِشر و البشّار
أُوعى إرادة شعب تتحدّو ..

بدّو أسد لمّا استجارو جار
جارو, وبترسانة عزم مدّو

بدّو أسد كلّل جبينو الغار
و كَيد الأعادي لـْ نحرهن ردّو

حامل هلال النّور للأخيار
وحامل صليب التضحيه حدّو

كلمه حِكيها وصحّح المشوار:
الله وسوريّّا وشعبي و بَس ,
وْمن كلمتو زهور الأمل ندّو

*********

3 ـ (( يا سيّدي )) :

يا سيّدي يا ماسك الدّفه
كفّي طريقك عالمجد كفّي

قود السفينه وواجه الإعصار
عرس النّصر مشتاق للزفّه .

الموج عالي والبحر غدّار
والمدّ مش باين إلو ضفّه

معْ هيك بدنا نكمّل المشوار
الوقفه بوجه الرّيح بتكفّي ..

معنا الإله الواحد الجبار
حسب الوعد, والوعد بيِوَفّي

ومعنا بواسل جيشنا المغوار
اللي عبْستو بترجّح الكفّه

وعينين سوريـّا بعهد بشّار
مادام قائدنا طبيب عيون :
ما رفّت العينين لو رفّه

*********

4 ـ (( قالو وقلت )) :

قالو سوريّا العمـ تناجيها
ماعاد فيها غير ماضيها

من بعد عزّ ومكرمه وإكبار
جارت, وبعدك عمـ تجاريها

كثار قبلك سافرو, وكثار
اللي تلوّعو بلوعة مآسيها

من شرقها لـْسهلة جبل سنجار
لمروجها وموجة شواطيها

من جْنوبّ خلـّد سلطنة ثوّار
لشمالها وآخر براريها

إترك النّار تحروِق الأشرار
وسافر على جنّة بعلاليها

بهونيك أرض بـْ يكبر المقدار
بتحميك لو مـَ قدرت تحميها

قلتلـّهن: ما يوم كانو كبار
الـْ مـ َ تعمّدو بتراب سوريّا
ولا شاركو بخبطة قدم فيها

*********

5 ـ (( صورة )) :

دمعه بـ ِ عينو وبالقلب حسره
و نظره مـ َفيك تـْفسّر النّظره

مدري تَعَب من لوعة فـْراقو
مدري عتب من فكرة السَّفره

ضَمو عـصدرو وطَوَّل عـْناقو
تخرسن لسانو ونطقت العَبره

رَدّ الـقـلـب: معقول يتلاقو
العينين لولا طالت النَّطره!!

وبادَر بِدعوه بْحجم أشواقو
من صوت صار بـْغصّتو مبحوح :
الله معك.. بحماية العذرا

*********

6 ـ (( حنونه )) :

بعد ما راح باعتلي رساله
يقلّي: كيف حالتكن يـّ غالي

كيفا أرضنا الـ ْخيَّبت ظنّا ؟
العريشه كيفها وكرم الدّوالي؟

بوطنّا مستوى العيشه تدنّى
وشـ ُ ناطر بعد ببلاد الجهاله

إذا بتقرّر تهاجر لـ َعنّا
تـ َ إبعتلك كفاله معْ حواله...

الرساله مـ َ مقدرت كفّي لأنّا
مثل موضوع إنشائي ومقاله

ووحي الشّعر فيّي ما تانّى
كتبت الرّد بالوقت الخيالي :

كتبتلّو : وطنّا لـو تجنّى
علينا وكيف ما صارت الحاله

بنبقى بأرض فيها العزّ حنّا
كفوف المرجله بـ ْإيد الأصاله

الجرس تـ َ يحنّ صوتو شو تمنّى
تشدّو للأرض مش للعلالي

و عنّا الطير بالموجود بَنّا
بيبني بيت من فضلة حقاله

يـَ عيني ارجاع و بكوخك تغنّى
وْبَدَلْ مـ َ تعيش عاله عيش والي

حنونه قسوة العيش بْوطنّا
وحنونه المقبره عنّا يّـ خيّي
و مـ َ بدها لا جواز وْ لا كفاله

*********

7 ـ (( مراهقة )) :
يـا رَيـت فيـنـا نِـرْجَـع مْــن جْـديـد
... وِ نْعـيـش قـصّـة حُـــبّ صبـيـانـي
نِـتْـبــادَل الـنّـظــرات و الـتَّـنْـهـيـد
... وْ تِتْبَسَّـمـيـلـي , قــــال عـشـقـانــه
نْقَضّـي المسـا شـردات وِ مْواعـيـد
... مِـن تـحـت تيـنـه لْ تَـحـت رمّـانـه
وْ نِحلَم بِبُكرى بْ لَون ثَـوب العيـد
حـلْـم الطّبيـعـه بْ مَـوسـم عْـيـانـه
وْ نِتْواعَـد بْـ هَونـيـك بَـيـت بْعـيـد
... هـربــان نـاطِــر وَعِـــد هـربـانــه
وْ تِغْفـي عـَ إيـدي وْ مِـدّ تانـي إيــد
داعِـــب جـدايــل سِـحــر رَبّــانــي
وْ قِـلِّــك أنـــا مـَ بْـرِيــد بالتّـحـديـد:
إلا ّ البَوسِـه , وْ بَعِـدْ شــي تـانـي
وتْجاوبي بْ همْس وْ خَجَلْ مـَ بْريد
تْـوَعّـي الغَـفَـى بِشْـفـاف عطشـانـه
ارويني بـ ْ قصيدة حُبّ.. عيد وْ زِيد
حِـلـْو الزجل لو يـِنـْغَزَل بالرّوح
وْ حـِلـْو العِشِق لو ضـَلّ روحاني

*********

8 ـ (( بستانيّ )) :

قالِت: يـَ جار الرِّضا يا شاعر وْ فنـّان
ارسِمْلي قصيدة غَزَل تا حَرْقِص صْحابي

مـ َ بـْريد غَيرَك يِجي تـ َ يْداعِب الرّيحان
وِ يـْطِلّ يِـسْــرُق حلا من تمّ عنّابي

قِلـْت: بـْ صريح العباره مشتهي وْ خجلان
البستان فـَرعـَن حلا وْ تاكي على بابي

لو تـِـسْـمَحيلي متل فلاّح بالـبـسـتان
راعـي مَشاعِر ورد وُ شْـعور لبلابه

مَرّات قـَطـِّف كرَزْ تاكي على الرّمان
إلعَب بـِ غصن الحلا وْ يـِلـْعَب بـِأعصابي

وْ مَرّات لـَمْلـِمْ شَهِد محموم عالمرجان
وْ فـَلـْفِشْ عـْباب الجَّنى بـِكْروم خلاّبه

وْ مَعْ كلّ طلعة شَمِسْ إسقي وَرِدْ عطشان
مْن عـْيون خضرا على التـّفاح مِنْسابه

وْ كلـْما يـِطلّ المسا يبقى معو سهران:
شاعر و حلوه و خمر تا تخلَص الخابي

*********

9 ـ (( تفتيش )) :

مَرّه بـْ زَماني كـِنِت بالمدرسـه غرقان
ما بين همّ الدّرِس والشّــرح و هْمومي

طـلـّتْ صبيّه متل طـلـّة قـمـر نيـسـان
قـِلـْت: (الجوكندا) مَعي بالصّف مرسومه.

قالِتلي: جايي أنا مْن ( التربيه) منشان
قـَيِّم دروس اللغه بـْجـولات محـتـومـه.

تـْحَمَّدِتْ ربّي وْ قِلِتْ: حـَنـّان يا مـَنـّان
تـْخَلـّي الوزاره لـِنـا و تـْديم لـِ حـْكومه.

وْ للحَظّ حـَامـِل معي طبشــور بـالألوان
وْ بلـَّشِـتْ حاكي الحلا بـْ ألوان ملغومه

أصـفـر بـِأوَّل سَــطـِر تا قـِلـّها غـَيـران
وْ خايف تكوني معي وْ للغـَير مقسـومه.

أزرق بـِلون السّما الـ ْشايف قمرها بان
أخضر تـ َ يرسُم أمل وِ يـْبَدِّدْ غـْيومي

أحمر بلون الورد يعني صِرِت عشقان
بـِحْياة ربّ السّما مْن الصّف لـ َ تـْقومي.

قامت و قالت إلي: يـا شــــاعر وْ فنـّان
وْ أستاذ فـَنّ الْوَمى مـِن غير ما تـُومي

اسمحلي بـ ِ آخر سطر اكتبلـَك العنوان
بـْأسـتاذ صَفّ اللّغه صفـَّيـْتْ مغرومه..

*********
زياد عطالله سطاح --- 9 / 7 / 2015

الإدارة 9th July 2015 07:29 PM

الشاعر ماجد سطاه
 
1 مرفق
الشاعر الدكتور ماجد سطاح

الملف المرفق 8798

وتفضلت السيدة نجاة طحان

بالترحيب بالشاعر الدكتور ماجد سطاح

متمنية عليه التفضل وإلقاء قصائده الرائعة على الحضور :

1 ـ (( أقبِل ))

أقْبِل فوجهُكَ في الظلامِ نَهَارُ.......وامضِ فنَهجُكَ عِزّةٌ وفَخَارُ
إنَّ الذئابَ على الشآمِ تكالبتْ..........وانتابها بعدَ العِواءِ سُعَارُ

ومن الذي سَيردّها مكلومةً ؟...........غيرُ الأسودِ كليثِها بشّار
فلأجل عينِ شآمنا يا سيدي .........اليومَ أنتَ اختارَكَ الأحرارُ

فامضِ على جثثِ الأعادي فارساً....ما همُّكَ الأهوالُ والأخطارُ
حُجَجُ الدُهاةِ المارقينِ تَحطَّمتْ......وعلى يديكَ تحطَّمَ الإعصارُ

اليومَ أنصافُ الرجالِ بغُصِّةٍ........سيرونَ تيَّارَ الزمانِ يُدارُ
بيديكَ, فالشعبُ الأبيُ لِصوتهِ .........أبراجُ وهمٍ شُيِّدَتْ تنهارُ

واذا دموعُ الأمهاتِ تساقطتْ .........وتخضَّبت بدمائنا الأنهارُ
وعلى جراحِ الياسمينِ تسلّقت .........أوجعُنا واغتيلَتِ الأزهارُ

و بكل يومٍ من غباءِ قذيفةٍ..............يتبعثرُ النارنجُ والجُلنارُ
وإذا بسحرِ الشرقِِ في سوريّتي....قد شابَ كُحْلَ الناظرينِ غُبارُ

سيظلُ شعبُكَ خَلفَ ليثهِ سائراً....مهما استطابَ نزيفَهُ المشوارُ
سيظلُ شعبكَ بانتظاركَ واثقاً .......أنْ لا سواكَ لنصرهِ بشّارُ

**************************

2 ـ (( خرق أمني )) :

تعجَّبت كِيف بعقلنا في خَرْقْ.....بمسمارْ , والشاكوش نازل طَرْقْ
دقّوهْ يللي براسنا لعبوا........كرمال تا ينسى بلمحة برقْ

عشتار شو كانت عند شعبو.........وزنبوبيّا شو كانت بهالشرق
وعَ الطرق يمكن كِتِر ما تعبوا...عَينيهْ صار يشوف ما في فرْقْ ..
بين المرا والجارية , ومن هَيكْ ....يمكن في عنّا ناسْ بدُّنْ حَرْقْ

**************************

3 ـ (( رثاء إمرأة شرقيّة )) :

سوريتي يا مرأةً شرقيّةً
سَجَدَتْ لها النجماتُ والأقمارُ

كانت على رملِ العصورِ إذا مشتْ
من حولها أحلى البلادِ تغارُ

الشمسُ ما انفكّت قلادةَ جيدِها
إن لاحَ للعتمِ الرهيبِ جِدارُ

سمراءُ لو جَلستْ إلى سُمَّارها
والريحُ بينَ بَنانِها أوتارُ

يسبيكَ لحنُ خُلودها فقلوبنا
من حولِ معصمها الجميل سِوارُ

هيفاءُ قامتها الجبالُ ووجهها
صافي السماءَ وشَعرها الأنهارُ

بعيونها الخضراء أروعُ غابةٍ
لأمانها ترنو لها الأطيارُ

حسناءُ صامتةٌ وحيثُ تكلّمتْ
من ثغرها يتساقط الجُلنارُ

عبر الشتاءُ بجسمها وبرعشةٍ
للبردِ أنهى حُلمَهُ نوَّارُ

وغصونها النشوى بطيب هوائها
صارتْ لحالتها العيونُ تَحَارُ

مقطوعةً يخبِرْكَ نزْفُ دموعها
أَنْ مَرَّ في هذي الرُبا جَزَّارُ

وتقولُ مذ برَدَتْ محبَّتكمْ , أنا
جسدي يَباسٌ تشتهيهِ النارُ

وتقولُ مأساتي كما مأساتُكم
بلْ بعضُ أشلائي هُنَاكَ غُبارُ

وتقولُ مأساتي كما مأساتكُم
بدمائنا وبجرحنا التجّارُ

**************************

4 ـ (( إبن الشهيد )) :

من سنينْ صرلو ناطرَكْ عَ البابْ.....وما كانْ الِمسافر بقا يرجَعْ
وكلما سْألْ إمّو عَ بيّو الـْ غابْ ...... بيحْتار ليشْ عُيونها بتدمَعْ

بيتزكَّرَك إبنَكْ كِنِتْ بالجيْشْ................وبنجُومْ كِلمَّا هالطفل شَافَك
شو يحِبْ يعرفْ , بَسْ, كِيف وليشْ؟...شايل سما بْلادو على كْتافَك

وشو كان كِلما يلمَح خْيالكْ.....من بعيد جايي , يركُض يضمّك
وهاللي تفَرفَط شَوق بْقبَالكْ............ شي تْلمِّو وشي بقا يلِمَّكْ

وهلّق يَ كِلْما البَالْ يصفَالَكْ ........ويشتاق إبنَكْ يرجع يشمَّكْ
بيشمْ كمشهْ من ترابْ الأرضْ........بيعرف بإنها انعجنِت بدمّكْ

هالغِصنْ لِي برِمشَينْ قَلَّمتوْ...............وياما بهَمْس الدَمعْ كَلَّمتو
لَ تْخاف رح يوقَف بوجْ الريحْ ..ومِنْ هالأرض مَ بيوم رحْ بيزيْحْ
ما دام عِشق الأرض علَّمتو...........وراية وطن منصور سَلَّمتو

**************************




6 ـ (( طالق بالتلاتي )) :

كنتي يا هوى عُمري حَضارهْ
بربيعو غَيْمْ وسْنيني صحارى

وكِنِتْ شوفِك أميرهْ وشوفْ حالي
بِعبّْ الغَيم حاكم عا إمارهْ

العذارى بقصر أحلامي قْبَالي
جواري , ناطرة منّي الإشارة

وكِنْت بْرفقْتِك من بِرجْ عَالي
بهَواكِ دَومْ حَرِّقص كِلّْ جارة

بلاكي حِسْ طَعم العمر خَالي
خسارة الْـ رَاح والجايي خْسارة

وكلما إشتِهِي ويطلع عَ بالي
وعلى شفافِك بشَفِّة شِنْ غَارة

معَاكِ صِيرْ رُوح , وجِسِم ما لي
بإثارة ما بَعِد منها إثارة

,وبعِدْ عِشرين عام عِرِفت , عَالهْ ,
إنتي عَ القلب عِشْتي بجدارة

شِفِتْ يا خاينة كيف بنذالهْ
بحَلْقي زارعة غَصّة ومرارة

عْرِفِتْ هالقلب صَاْرْ بَدّو إحالهْ
عَ شي دَكتورْ عا كتر الحرارة

وعليكي شِفْتْ كِيف بعزقتْ مَالي؟
الـْ بيشْري كانْ سيّارة وعمارة

ولهَيكْ عْهَود أيام الخَوالي
مَ بيني وبينها مْسَحْتْ بعِبارةْ

وخمس سنين صرلي يا غوالي
مطلّقها , ومِتِلْ هاليوم قايلْ

طالق بالتلاتي يا سِيْجارة

**************************



8 ـ (( هلوساتْ )) :

لا
لا تخافي
حبيبتي
إن جُنّ في قلبي الهُتَافْ
وتخاطرتْ بحروفِ إسمكِ
مفراداتُ قصائدي
فالثغرُ منِّي اليومَ
ينوي الإعترافْ

بذنوبهِ
فإذا اقتربتُ بأضلعي
وبها اشرأبَّ
الشوق في صدري
و طافْ
لا لا تخافي
فكلّ حَضارةٍ منسيةٍ
مغمورةٍ
في البحرِ
يضحكُ وجهها
لمغامرٍ
في العُمْقِ يهوى الإكتشافْ

لا لا تخافي
وكوني الريحَ في أغصانِ قلبٍ
فاتَهُ زمنُ القِطافْ.
واذا اضطربتي
لِتَهدئي
في مُقلتيّ تطلّعي أحبيبتي ..
فرُبا هَواكِ بداخلي
هيَ مرتعُ الأحلامِ
تملؤهُ الخِرافْ

لا لا تخافي
لا لا تخافي
وإنْ خَشيتِ من الهوى
لا تخجلي
فأنا
وبرغم كلّ شجاعتي
في الحبِّ
أشعرُ أنني
يا حلوتي
من خوفِ عينيكِ أخافْ

**************************

9 ـ (( زيدل )) :

زيدل يا دار بنور مَكروزة .......عْرفتي بعشق العاشق تفوزي
يا بنت شقرا وجِّها صورة ........وعيونها خضرا عَ فيروزي

لبست خَضار اللوز تنّورة .......وطهر السما عَ جسمها بلوزة
عنقودها بيضحك لـَعصفورة ......عا ضحكتو بتغار فيروزة

هيي أميرة وداير قْصورا .......في قلوب مثل السور مدروزة
بيلبقلها كْنوز ببحور الشعر ..... ومن هَيك عم قدّملها كنوزي

**************************

10 ـ (( آية سوريا ))

عم بنطُر جْبال الضباب تزيحْ
وشوفِك على مْواج الضَجَر جايهْ

ووجِّك سَفَر ضِحكاتْ ومْراجيحْ
وسْهولْ خضرا مالها نهايهْ

وتحت السما الزرقا ابتدى تفتيحْ
... عْيون جيْلْ نْ خَفْقِتْ الرايهْ...

بَسْ طَلَّعِت عَا فوق تقرى مْنيحْ
إسمكْ يَ سوريَّا ورى كِلْ غَيْمْ
موجودْ بكتابْ السما آية

**************************

11 ـ دروب الهوى (هدية لشهدا الوطن )

عاشق على دروب الهوى تربّى ....
المَوعَدْ نَدهلو والنِدى لَبّى
وزهرة شبابو قَدَّم هْديّهْ ........
لأول صبيّة بهالدني حَبّا
جبينو بأرض جْدودنا مْفَيِّي ....
عا كِل وردهْ ت المدى تعبّى
فَتّش عَ إسمو بكل جوريّة....
وبكل ضحكهْ سَبَّحت ربّا
غْيابو الْـعَطانا فجر حِريّهْ.....
وهَلّق وقت بتغيب عنّا الشمس....
شمسو بتسطعْ ما بتتخبّى

**************************

12 ـ (( عشقان قلبي صبيّة )) :

عشقان قلبي صبيّة والهوى شو جارْ
عا قلب كلشي جمال بيعبدو عبادة

حلوّة وعليها انْ خَفَقْ من خفقتو بيغارْ
كلما بسماها ضِحِك زهر بعطر هادي

وبيومْ غاب الربيع وما إجا بآذارْ
والمرج يللي انوَعَد تَ يصير سِجّادة

صَفّى كأنّو جمر يسْكَر بطَعم النارْ
والعتم سكّة سَفر والريح زوَّادهْ

وأربع سنينْ الوجع ما حَلّ عنّي نهارْ
ولا كانْ حُبّي انتسى , ومن كَيْد حِسَّادي

هالحب كل الدِني وقفت بوجّو وصارْ
بيني وبين الحبيبهْ بْكِل مدى وادي

وغصون خضرا دِفِي بوْراقها الوروارْ
عِريتْ وصارت على الغِربان مَ تنادي

وتْلال ياما ضِحِك عَ خدودها نَوَّارْ
صارت عَ دمعْ الوجَع والدم معتادهْ

وكيف رح بيعيش وبيدومْ الحُبّ , والأزهارْ
شربت دموع بمَواسم مَوت مِش عادي

يا سوريا يا وطن يا جرح عاشق غارْ
بهالصدر, جسمي كفن لَتراب أجدادي

الِكبارْ عَم يزغروا وعم يكبروا الِزغارْ
فيكي وبقلبي الحِزنْ كَبرانْ بزيادي

العشّاق عم ينقَصوا , وعَم يكتَروا التُجَّارْ
بحب الوطنْ , عَينُهُنْ عا لقمة ولادي

وخايف لوْ طال العِمْر تَ يطِلّْ ضْو نهارْ
ومَ تشوف عيني سما وشمس وهوى بْلادي

**************************

13 ـ (( هجرة ))

وبْقولْ كِلما بيسألوا صْحابَي
مَ حْجَزتْ دَورَك لَيش عَ الهِجره؟؟

ما دام صفّى هالوطن غَابهْ
بينسوا بإني بهالأرض شَجْرهْ

مَ بتوصَل شروشي وأعصابي
عُبوهْ وقذيفة هَاون مِنفجْرهْ

وما همنّي تكفيرْ إرهابي
أو ناس بيشوفوا الوطَن تَجْرَهْ

ومنْ هَيك ما رَحْ بهْجرْ تْرابي
خِلِقْتْ هونْ , وهونْ بدّي عِيْشْ
لو ما بِقِي حَجْرة على حَجْرة

**************************

14 ـ (( بلاغ صادق )) :

قالت بكلِّ عذوبةٍ : أتحِبُّني ؟.........وبجَفْنِها قد نَاءَ حِمْلُ هَواها

وكأنَّ عينيها تعيشُ بغربةٍ.............واستسلَمتْ لِحَنينها عَيناها

فاحترتُ يا ويحي بماذا أُجيبُها..؟.....والعقلُ والإلهام ُ ضاعَ وتاهَ

بلْ كيفَ أُقنِعُها بأنّي عَاشقٌ ؟............بعبارةٍ ما قلتُها لِسواها

أ أقولُ يا شكوايَ وحدَكِ لوعَتي...ومُصيبَتي الكُبرى التي أهواها ؟

أمْ أنتِ سِرُّ بلاغةِ الشِعْرِ الذي......بحروفِ إسمكِ نبضهُ يتباهى

أمْ أنتِ حَاكمةٌ لقلبِ عَابثٍ ..........ما فوقَ عرشهِ طَيشُها وَلَّاها

وبلحظةٍ , والصمتُ يضربُ موجَهُ...شُطآنَنا , والصخْرَ يُخْفِي الآهَ

أدركتُ أن المفرداتَ بليدةٌ.............وعرفتُ أن تلعثُمي أغراها

وبغفلةٍ من ذا الهُراءِ بقبلةٍ ............صِدْقَ الكلامِ تَبلَّغتْ شفتاها


******************************

( نتابع معكم )

الإدارة 9th July 2015 07:50 PM

الشاعرة السيدة عبير ديب :
 
2 مرفق
كما تفضلت السيدة نجاة طحان بالترحيب بالشاعرة السيدة عبير ديب متمنية عليها التفضل وإلقاء قصائدها الجميلة كمحياها على الحضور :


الشاعرة السيدة عبير ديب :

الملف المرفق 8799

1 ـ (( تحية للشهيد ))

غطِ الســماء بعطـر ألوان الكـفـنْ
وامسح غبار الموتِ عن وجهِ الوطنْ

دمــك الطهـــور أمانةُ الباري بنــا
ودمــاء أعداء الشــآم له الثـمـنْ

حين القبور تفتحت أبوابها
توّاقةً مجد الزمان ستحتضن

شهق التراب وما احتوت طبقاته
يوماً رفاة البرق أو هام القُننْ

عذراً فإن الموت دوماً سيدٌ
لكنه عند الشهيد لمُرتهن

**************************

2 ـ (( سفور ))

عاريةً منّي أمضي
أطلِقُ أغصاني للريحِ

و أبكي معْ دمعِ الطرقاتْ
سافرةً و أسيرُ بقلبي السّافرِ

تلسعني شمسٌ ما ...
و أسيرُ .. أسيرُ

و أسألُ

هل إنَّ سفورَ القلبِ منَ العوراتْ
حافيةً أنتعلُ التهمَ الملقاةَ

َ على ضلعي المُعْوَجِّ
أهدهد لَعَناتي ..

يرجُمني الخَطَأةُ
يقتاتُ بحزني المختلونَ

زناةُ كهوفِ الغيبِ
هواةُ الشّمعِ الأحمرِ في أفواهِ الحيَواتْ

وبمعصمِ روحي ...
تصرخُ أصفادُ التاريخِ

(( تمردْ يا ذاكَ المعجونُ من امرأةٍ .. ورفاةِ حياة ))

أتمردُ
أخلعُ أصفادي

أتنفسُ قدري
تنفضُّ بكارةُ أحلامي

و أعيشُ بعمري الباقي
كل العمر الآتْ

**************************

3 ـ (( شرقيات ))

أيا من تسائلني من أكونُ
أنا القهرُ جلُّ غذائي
ومائي الشجونُ
ولدتُ و سيفُ الخطيئةِ
ماضٍ بعنْقي
وشرقُ السبايا حزامي و طوقي
صُلبتُ .. رجمتُ
وكان صليبيَ مهدي ...
طريقاً للحدي
ومالي بذنبي خبرْ
ولست المسيح لأغفر فعل القدرْ
أنا الأرض رغم الجفاف
سأبقى العطاء
وإن لم تزرني دموع السّماءِ
سأُخرِجُ من رحمِ صبري المطرْ

**************************

4 ـ قصيدة (( ليش الخوف ؟ ))

ليش الخوف بِ لوحتك أكبر ؟
ليش العتم بِ لونها أكتر ؟

بالرسم فيك تكذِّب الغطاس
و ترسم بحر هادي و موج أشقر

وترسم شفق حنطي معو كاسة عرق
والشمس متل رغيف ومقمّْر

لا تقول لونك مر .. خلي الناس
ترتاح من هم ( ال ع بكرا شو ؟ )

و تنسى بلوحة مرجك الأخضر
لون الرماد التحت منو جمر

و بالرسم غطي درب اسمو العمر
مجنون

كلو قزاز و مكسَّر
علّي بلونك نبرِة الأحلام

وقوس القزح لا تتركو ت ينام
عملّو عزيمي اليوم عالدفتر

وان شاف لونك طفل من عمر الندى
ضيّع ع باب الحرب مفتاح الهَدى

مسروق من أمسو
راكض ورا يأسو

ارسملو نجم تا يندهو
مربوط بخيوط الضحك

غزل البنات بيشبهو
و وج الصبي لا ترسمو معتر ..

لا ترسم بواريد بتصيد الفرح
وارسم اذا بتريد قطبي للجرح

رش الموت بِ ريشتك سكر ..
وان خالفوك الناس بالفكرة

وقالو برسمك بهرجي و تزوير
قلن أنا عم ارسم ال ( بكرا )

ماكتير نحلم بالصبح .. ما كتير
رسمي الحقيقة الراسخة

و الواقع مزوَّر !!!
والواقع مزوَّر !!!!!

**************************

5 ـ (( قصيدة : بتحبني ))

بتحبني ؟؟
بحبك أنا ..

ريحة مطر يرتاح ع صدر الدني
ريحة كلام الولدني

ريحة ملح بدموعنا
يحفظ عجين الحب تَ يخمِّر ورد ع دروبنا

و نكبر مَ نسأل من عمرنا الجاي باقي كم سني
بتحبني ..؟

قد الدني بحبك انا .. قد الشعر .. قد الخمر
قد المسيح الي انتصر

عالموت بالموت
و حضر بيناتنا

وقد الصور من يوم أدم حب حوا الماجِني
بتحبني ..؟

بحبك أنا .. أبعد من حدود الطهارة و الكفر
أبعد من التنين عن روح الخضر

أبعد من جنون الموسيقا والغني
بتحبني ؟؟

بعرف أنا .. و بحب أسمع كل يوم حروفها
مركب أمان يسافر بحلمي و عروس يردني
بتحبني ؟؟

**************************

6 ـ (( قصيدة : قديسي ))

عيناكَ كتابانِ سماويانِ صديقي
وانا طاعنةٌ في الإلحادِ

وقدري .. أهواء إلهٍ
يتخطى كل مجون الأصنامْ

شفتاي أنا لصٌ محترفٌ
يتخفى خلف البسماتِ

وألوان الطيفِ
و يسعى

لكن شفاهك
في ارض الحب ... امامْ

لا تسأل عن عمر جنوني
المتسكع في اروقة الشمسِ

الظاهر و المخفي
المتغلغل في بتلات اليأس

المنثور على الأقمار
على الأحجار

وفي جوف المحار ... تباشير غمامْ

فأنا لم أسأل منذ عرفتك
عن عمر الحكمةِ

عمر الله
و عمر جبال الأولمب .. سفينة نوحٍ
أو عمر تعاقب ليليَ .. و الأيامْ

قديسٌ أنت صديقي
ضيّعت المعبد

فلتفطر هذا اليوم
على شفتيَّ

على خديَّ
على فاكهة الجنة في نهديَّ

وبعدي ...
لتكن كل الشهوات ... صيامْ

**************************

7 ـ (( معجون هذا القلب ))

من قال ؟!!
معجونٌ هذا القلبُ بماءِ الحبِ

غداً سيوزعُ ألفَ رغيفٍ للبؤساءِ
يخبئُ فيها المنشوراتِ الممنوعةَ

مخبوزٌ هذا القلبُ بنار الشوقِ إليكَ
تعالَ و صبَّ عليهِ الخمرَ القدسيَ الألوانِ

تعالَ وباركْ في نبضي طعمَ القربانِ
تعالَ فإن الله تعالى
هنا .. بيني .. بينكَ

من قال بأن اثنين على الحبِ اجتمعا
و يكونُ الثالثُ بينهما ... الشيطانْ ؟!!

**************************

8 ـ (( خمريات ))

قلتلو بهاك السهرة
شو بحبك إنتَ و شربان

الخمر بشريانك مهرة
وشفافي مازة و ميدان

قلي الخمرة يا حلوي
حكاي بسهرات سنيني

ما بعمري عديت قداح
و برويها و ما بترويني

لكن لمـــا قــدِكْ لاح
ولعت نار كوانيني

لون ال بخدودك تفاح
و أدم جدي يناديني

صدرك كرم دوالي وفاح
دربو طلوع بتغريني

نبيدو أقوا من الجمرة
معتق بخوابي الرهبان

وقلتلو بهاك السهرة
شو بحبك إنتَ وشربانْ

**************************

عبير الديب 9 / 7 / 2015

وفي الختام تقدمت السيدة نجوى اليان رئيسة الوحدة النسائية في بلدة فيروزة وتوجهت بالشكر للسيدة نجاة طحان رئيسة الوحدة النسائية في زيدل والشكر للشعراء في هذه الأصبوحة الجميلة, ودعت إلى التعاون المستمر بين الوحدتين والمركز الثقافي لإيصال نور الجمال إلى العقول وختمت كلمتها بالتمنيات الطيبة والنجاح الدائم والعطاء المستمر لكل من له قدرة على العطاء .


السيدة نجوى اليان

الملف المرفق 8850

silva 9th July 2015 08:04 PM

يسلموا الأيادي التي أسرعت بالنقل المتميز
كانت رائعة هذه الاصبوحة الجميلة والشعراء المتميزين
شكرا للنقل وللوحدة النسائية وللمركز الثقافي ولمعمل تصنيع العنب ولتواجد المرأة العاملة المعطاءة

Elie Swed 9th July 2015 08:20 PM

صور الأصبوحة :
 
10 مرفق
ــ ((( سيدتي الكريمة سيلفا شكرا لك حضورك المتميز ))) ــ


Elie Swed 9th July 2015 08:26 PM

باقي الصور :
 
10 مرفق

Elie Swed 9th July 2015 08:34 PM

الصور :
 
10 مرفق

Elie Swed 9th July 2015 08:42 PM

باقي الصور
 
10 مرفق

Elie Swed 9th July 2015 09:03 PM

الباقي من الصور :
 
5 مرفق
ما تبقى من الصور :

الملف المرفق 8852

الملف المرفق 8853

الملف المرفق 8854

الملف المرفق 8855

الملف المرفق 8856

كل التمنيات بالنجاح للشعراء الكرام

والشكر الجزيل للوحدة النسائية في زيدل

والشكر والتقدير لسيدات المركز الثقافي

والشكر للسيدة صفاء بشارة المساعدة في التوثيق


وإلى لقاء أجمل

(( مع تحيات : إيلي سويد ))




ماجد سطّاح 10th July 2015 12:18 AM

كل للشكر لإدارة الوحدة النسائية ولإدارة المركز الثقافي في زيدل اللتانِ شرّفتانا بدعوتهِما لنا للمشاركة في هذهِ الأصبوحة والإحياء للذكرى العزيزة على قلوبنا ....
كل الشكر لإدارة موقع زيدل ممثلة بمدير الموقع السيّد إيلي سويد وللسيدة صفاء بشارة اللذانِ قاما بتوثيق هذا النشاط .
مع التمنيات لهم جميعاً بالتوفيق الدائم واستمرار العطاء .
:greeting:

ماجد

ziad sattah 12th July 2015 09:49 PM

للشكر للرب على النجاح المتميز لهذه الأصبوحة
شكرا ً للاتحاد النسائي للسيدتين نجاة و نجوى , وللمركز الثقافي على الرعاية
شكرا ً للحضور الجميل و المتميز
شكراُ عمي أبو هاني على الجهد الكبير و للصديقة صفاء على المساندة و المتابعة
شكرا ً سيدة فضة و الشاعر د. ماجد على التعليق و على كل شيء .

silva 16th July 2015 02:55 PM

ما أجمل أن نتبادل الشكر في كل المناسبات التي تجمعنا على المحبة للوطن و المنطلق من أفواح شعراء مميزين بكل ألوان الشعر المتدفق من صخر الوجدان الوطني الحريص على القيم والأخلاق
شكرا للجميع
ولقد أردت أن أعرف بالسيدة الفاضلة نجوى اليان هي تشغل مركزا في رابطة المركز للاتحاد العام النسائي وكانت ممثلة للمكتب الإداري فرع حمص بحضور هذا النشاط المتميز ولها كل الاحترام والتقدير
شكرا لحضورها


جميع الأوقات بتوقيت GMT +3. الساعة الآن 06:28 PM.

Powered by vBulletin V3.6.2. Copyright ©2000 - 2021
تصميم الموقع وسام عبد العزيز جميع الحقوق محفوظة, Copyright ©2001 - 2021

المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص