منتديات زيدل

منتديات زيدل (http://www.zaidal.com/229/index.php)
-   الشعر العامّي والزجل (http://www.zaidal.com/229/forumdisplay.php?f=50)
-   -   كنت ناطر ..." هديتي بعيد الإم للمرحومة إمي " (http://www.zaidal.com/229/showthread.php?t=18132)

ماجد سطّاح 22nd March 2015 07:35 PM

كنت ناطر ..." هديتي بعيد الإم للمرحومة إمي "
 
كنت ناطر
((هالقصيدة هدية عيد الإم للمرحومة إمّي))
=========
كِنْتْ ناطر ضْحكْتِكْ بالعيدْ .....تمحي الشِتي وترسم ربيع جديدْ
=
كنت ناطر اعْلَق بْضَمّهْ ........بحِضنِك ومشوار الطفولة عِيدْ
=
كنت ناطر تكْبَر الَلمَّة ...........تحت السما ورموشِك عْواميدْ
=
كنت ناطر إغرَق بشَمِّة .........بنهر الدفا وإتنشَّق التَنهيدْ
=
بس القدر لو رَاد يا إميّ .........اللي بإيدَينا , عَ غمضهْ عَينْ
=
بَسْ فَتَّحت بيصير مش بالإيدْ
=========================
ولليوم بعدي بلْمَحِك نيسانْ .........خْدودِكْ زَهرْ أبيض, إيديكِي خُضْرْ
=
وبركُض بهالمَاضي طفل هِربانْ ....وبُوقَعْ , وإنتي بتندهي ( يا خِضْرْ)
=========================
وبشوفْ فَيّات العِنَب والتِيْنْ ..........الْـ غِفيو بعَينيكِ عَ مَرّ سْنينْ
=
وهالقلب ساهي عَ الغصنْ عَصفورْ ...لمحة, وبيسرقهُنْ هوا تشرينْ
=========================
وبشوفْ صَابيعك على الغِربَالْ ........القَمْحْ بزماني الرَّاح مَ تدَرَّي
=
نِسيوا الشَقَى عا شردة الموَّالْ........وصَوتِك جْروح الدَهر مَ يعَرّي
=
ولمّا الشمس تحمى بسما هالبَالْ ....وماااا بتِسْمَرِّي , بتشْقَرَّي
=
بمِدّ إيدي لْإيدْ مَ بتنطالْ.........وبحني تَ بوسا وعارف بسِرّي
=
كلشي أنا شِفتو ومَرَّ خْيَالْ ........ ..وبْدال عاخدّي مَ بوسة نَالْ
=
بدمعة حِزن عَ الخَد بتِمِرِّي
=================================
ماجد سطاح
21/03/2015
وكل عام وكل إم وطن , وكل وطن بخير .

ربى عبد الحي 1st April 2015 03:05 AM

الله يرحمها ويصبركم على فراقها

القصيدة جميلة جدا ومؤثرة جدا جدا

سلم قلمك دكتور ماجد

ماجد سطّاح 3rd April 2015 11:56 AM

الأخت والصديقة صاحبة القلم الساحر ربى عبد الحي, شكراً لمشاعرٍ طيّبة , ورأيٍ شفّاف حملتهُ إليَّ كلماتكِ العذبة .
لا أذاقكِ الله مرارةً فقْدِ عزيز ..ودمتِ وقلمكِ بألق .:greeting:


جميع الأوقات بتوقيت GMT +3. الساعة الآن 05:28 PM.

Powered by vBulletin V3.6.2. Copyright ©2000 - 2021
تصميم الموقع وسام عبد العزيز جميع الحقوق محفوظة, Copyright ©2001 - 2021

المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص