عرض مشاركة واحدة
  #5  
قديم 12th February 2016, 03:16 PM
الصورة الرمزية Elie Swed
Elie Swed Elie Swed غير متواجد حالياً
مدير عام و مشرف المنتدى الإداري
 
تاريخ التسجيل: Aug 2003
الدولة: zaidal
المشاركات: 1,388
الجنس: ذكر
Elie Swed is on a distinguished road
نتابع مع الشاعر د. ماجد سطاح :

(( إمرأة ساخنة جداً ))

لو تعلمينَ اللآنَ كَمْ أهواكِ..........أحبيبتي , مُذْ ذقتُ طعمَ دفاكِ

وعرفتُ ما معنى الحياةَ بنعمةٍ ..... وشكرتُ من قلبي الذي سَوَّاكِ

ساعاتُ أقضيها بقَدَّك شارداً................متأمّلاً وأقولُ ما أحلاكِ

وإذا إلى الشبّاكِ سِرتُ لبرهةٍ...........في لحظةٍ يغتالني شُبّاكي

والله لولا الخوفِ من جَورِ اللظى.....قَبَّلت من شَغفي وبرديَ فَاكِ

ولكي تدومي في رحابي شُعلةً ...... فَلتعذريني اليومَ في إرباكي

إذْ صِرْتُ أحتسبُ الدموعَ أعدُّها.....في طَرْفَكِ الغالي الجميلِ الباكي

ويدي على مجرى الدموعِ أشدَّها...وأقولُ ما هذا البكاءَ ؟ .. كَفَاكِ

فالغازُ والمازوتُ صارا مُنكراً ........في موطني كالخَمْرِ والتنباكِ

والغازُ والمازوتُ صارا لعنةً ....والسَعي خلفهما طريقُ هَلاكي

****************

(( طلاّب ))

كانوا سوى عا مقعَدُن طُلاَّبْ ..... وهيي بجمالْ عيونها الخَلاَّبْ

جنّة حَلا , الأحلام يتخبّوا ..... فيها مَ بين التِيْنْ والعِنَّابْ

وبيوم كاسو من الهوى صَبّوا ..... هَالعاشقْ , وغَبّوا تَ عَقلو غَابْ

وعَ رْفيقتو تَ يصارحْ بْحُبّو ..... بوَردة هَجَمْ متل السَبِعْ ما هَابْ

وعَ الباب قلبو من القَهِرْ كَبّوا ..... لمِّا حِكِي , ورِدِّت بوجّو البابْ

وهَيكْ ضاع بهالوجَع طِبّو ..... وغَاب الدوا عن جرحها اللهَّابْ

وهيي , بعد مَ عيونها غَبّوا ..... لهفة عُيونو , خَزَّقِت الحجابْ

الْـ ياما وراهْ شْواقها توَبّوا ..... حُبَّو, ورِجْعِتْ راجَعِتْ الحْسَابْ

وحَسَّت بإنها مْتيَّمهْ وهَبّوا ..... جوّاتها , وشِعلوا مواسمْ آبْ

و(عَ كتاب عِِِيري) دموعها لَبَّوا ..... دِغري النِدا , وبكلمتينْ عْتابْ

كَتْبِوا إلو شوباك يا (بُوبُّو ..... بالعشق) وَينَكْ ضِعْتْ ؟, قلبي دابْ

وبقْيت سِنة الأحلامْ يتنبّوا ..... بكرى برَجعتو , وهالحلم كدّاب

وما كان يرجعْ شَبَّها , ونَبّوا ..... عْليها أهِلْها , ومَ انشفَى السرسابْ

وبكيوا عليها , وبَخْتَها سَبّوا ..... لِمْ روحها طِلعتْ لعَندْ الآبْ

ومن هَيك يا طُلاّبنا تربّوا ..... وتعلَّّموا من الي بدَرسو خَابْ

الْـ مَا كانْ رحْ يلْقى غَضَبْ رَبّو ..... هالراسب بصفّو , ورِسِبْ بالحُبْ

لو كانْ شي مرّة فَتَح الكَتَابْ

=================

(( بحبِّك ))
بهالعيد لمّا نْويت نَقِّيلِكْ...وردة شو جوّى القلبْ تحكيلِك

مَ لْقِيت إلاّ خَمْرة الجوري ...تحِسّ بسَكَر عُمْري مْقَابيلكْ

*

وللذاكرهْ لمّا عْمِلِتْ جَرْدِةْ .......بفضْلِك عْليي طالِت الشَرْدهْ

وعِرْفت صَعبهْ يا منى هالقلبْ...عِطرك بقلبي تشرحو وردة

يَ عْيونْ قَلْبتلِي كَيَاني قَلْب......لولا دفاها بْموت من بردي

وقَدّْ من شفتو صَلَبني صَلْبْ.......مَ انشاف بالوادي ولا مْحردة

من بعد ما عَقلي سَلَبْتي سَلْبْ........ما ظَل عندي حِلْمْ لَسنيني

غيْر عِيْش جُوَّاتِك حِلِم وردي

*

بحِبِّك يَ عِطر الهَمْس والبَسْمِهْ.......قَد الشَجر مَ بيعشق النَسمهْ

وقَد الصلا مَ بتعشق الإيمانْ.......وقد الشِعْر مَ بيعشق الرَسْمهْ

بحبّك مَلاكْ وبعشَقِك إنسانْ........بالمطبخ , بفسطانِكْ الرسمي

ونَارْ بَسْ تغمُر طِفل سِخْنانْ......بحِسْ عم يبرُد معو جِسْمِي

بحبّك أنا وبحلُف يَ إم اليانْ.....يا قِسْمهْ سنيني يَ ليلْ , نْهارْ

بتشِكَّرو لألله عَ هالقسمهْ

****************

(( جمر وهوى ))

كرمالْ عَينيكي شو بحْلمْ كُونْ......بهالعمر لو مرّهْ حَكيم عُيونْ

تَا لبّسِكْ للحُب نَظَّارهْ ...........تَ تْشوفني وحدي أنا عَنْ دُونْ..

كلّـشي بيحبّوكِي بهالحارهْ .......وبجنانْ خَصرِكْ عَقلهُن مَسجونْ

حاجة بقا الكلماتْ محتارهْ ....عَ لسَانْ فِيِّ القَلبْ عَم بيخُونْ

كلما بيشِنْ هْجُومْ أو غَارهْ ......وبالحُب مَ بيفجُر معو المَخزونْ

من هَيك جِيْت لْقِيت دُبّارهْ .........ولنّو الشعر مَ بيحكمو قانونْ

خلف حَقْ الشاعر اتوارى .....قلبي , وإجى تَ يبوح بالمكنونْ

يقلِّكْ مَ فينا نعيش يا جارهْ ........ومدفونْ جُوَّاتي هَواكِ هَيكْ

وجواتْ قَدِّكْ في جَمِرْ مدفونْ

****************

هديي متواضعة لروح الشهيد الصديق الشاعر المهندس سامي سعادة

(( آخر قصيدة عشق ))

بقلبو سكنتي وكانْ عِشقِك هَمْ ........متل الضَنَا , ومتل المرا والإمْ

يا سوريا, ومن هَيكْ ( بُو كابي)......صاغِكْ قصيدة مْسَطَّرة بالدمْ
*
أروع قصيدة انكتَبِتْ بإحساسْ..........شاعر على جبينو سَمَار الأرضْ

غَيم السما بوقفة شْموخو بَاسْ ... داوِتْ وطن مجروح طولْ وعرضْ
*
هالشاعر تعوَّد يرش ورودْ.............عالمنبر بصوَتو بكِل فَقْرهْ /ا

وقرَّر يصِبّ النار والبارودْ .........عا ناسْ لَ بتسمع ولا بتقرى
*
يا غصن أخضر عا جْروحو كَزّْ ....لمّا جْرح هالأرض بَلَّش نَزّْ

بهالعاصفة بشرشو كَمَش الترابْ.........مْآمن بإنّو العمر وقفة عِزْ

*
بكرى نْ مرق نيسانْ عَ الوادي ......رح يلمَح خْيالَك عَ خَدْ الشِِيْرْ

والنهر عمَ يسمع شِعرْ هادي ......برمشَك هَمَستو لْجَوقة عْصافيرْ

وكلما بزيدل جِرحها ينادي .......بشَحرورْ شَدّو العِشق عَا بكّير

إبنْ وصِهِرْ من عَيْلة سْعَادهْ .. (سامي) إسم رَحْ تذكرو وتقولْ:

كبير عاش وهَيْك مَاتْ كبيرْ

*

يللي هوى الأوطانْ رِسْمَالَكْ.............وقْرَنَتْ كْلماتَك بأفعَالَكْ

إنت ما نِلَت الشهادة هَيكْ..............تاج الشهادة يا بطل نالَكْ

سوْريا وطن باقي بأمثَالَكْ

****************

نتابع باقي الأمسية مع الشاعر زياد سطاح


__________________
الأرض التي تقع عليها متـألماً

عليها تتكئ وتقف من جديد
رد مع اقتباس

Sponsored Links