عرض مشاركة واحدة
  #7  
قديم 12th February 2016, 10:48 PM
الصورة الرمزية Elie Swed
Elie Swed Elie Swed غير متواجد حالياً
مدير عام و مشرف المنتدى الإداري
 
تاريخ التسجيل: Aug 2003
الدولة: zaidal
المشاركات: 1,388
الجنس: ذكر
Elie Swed is on a distinguished road
نتابع معا باقي قصائد الشاعر زياد سطاح :

باقي القصائد للشاعر زياد سطاح :

(( ياحلو ))

يا حلو مش حلو الحلا هالقد

داخو البشر ما بين أخذ و رَد ْ

في ناس قالو: دعم من الله

وفي ناس قالو:السحر إيلو يَد

وفي ناس شافو سحرك تْجلّى

بالروح , أو بالقد , أو بالخد.

لمّاا بتمشي بيندهو اسمالله

وكلما ضحكتي روحهن ترتد

وما شــاف أســرار الحلا إلاّ

شاعر بقلبو شاف قلب كبير

وإحساس بعيونك مـَ إيلو حـَد

****************

(( سهرانه ))

كانت لوجه الصبح سهرانه

هالقاعده بالطابق الثاني

وقاعد أنا مقابيل هاك البيت

بـْ هاك الحديقه والدِّني عيانه

شاعر حبيس الـْ لو والـ ياريت

وكاسات عمـْ بتودّع قـْناني

منشـانها ســهران عالسّـكـّيت

وْيمكن سَـهَرها كان منشاني.

ثوب العتم ودَّع سراج الزّيت

وْمثلو أنا ودَّعت حلم النّور

لـَ قـْدِرت نيران الصبيّه زُور

ولا كنت منها نال قربانه

****************

(( من وحي أركيلة ))

يا ريتني بـْ أركيلتك دخّان

إنزل عصدرك شوف أسرارو

وْ عن سرّ قلبك فلفش الكتمان

وْإحصل عـَ موجز كلّ أخبارو

وْ إسرَح عمهلي سرحة الرّهبان

إتعمّق, و أنفاســـك يـغارو

ومن بَعدها إطلَع و مش ندمان

بـْ يـكـفـي بـ ِ إنّي مر ّ عشفافك

داعب جـمـر مـ َ بـتـنـطـفـي نـارو

****************

(( غيرة ))

مـَرِّتْ سنه, والجيب موعوده

بـْ ( آلاف )هِيـّي ثمـْرة جـْهودي

و اليوم طلـِّت زوجة المديون

تـِتـْمايـَل بـْغـنجات مـقـصـوده

حمـْلـِت معاها المبلغ الميمون

غـافـي بـْحضن صابيع ممدوده

وْ بالشّكر جادت من قلب مرهون

وْ أربع خمس كلـْمات معدوده ..

وْ مالـِت عـَ إبني تـْبَوّسو, وجـْنون

خَربَط كَياني وْ نَعـْنَش جـْرودي

من غيرتي تـْجَدَّد ْ عهد (نيرون)

بـْنيران تكوي خـْدود محـْسـوده

ردَّيـت مِن روح وْ قـلـب مفتون

وْ ينقال عمـ إتجاوز حـْدودي:

لو تعكـسـي الآيه, وْ أنا ممنون

يا رَيـتـِك بـْ تعطي الصغير المال

وْ يـْسـَلـّمو شـْفافـِك على خـْدودي

****************

(( عتب ))

شو صار حتّى تعتبي عـْليّي

وتفلفشـي أســــرار منسـيّه

شو صار تـَ الأخبار دارتنا

وْعا زَعِلْتِكْ هالقدّ ما فيّي

ياما غصون اللوز دارتنا

تا ما يـشـيعو الناس خبْريّه

وْكان القمر ينطر زيارتنا

ونســــاهرو للصبح ليليّه

وعالعشق كلـْما نشنّ غارتنا

نحرق ونطفي شفاف خمريّه

واليوم صرنا يا خســارتنا

نمحي صور أحلام ورديّه.

عمـْ يســـــألوني أهل حارتنا

ليش الزعل.. شوعامل خْطَيّه

كلـّو لأنـّو غـْمَزْت جارتنا

وْضمّيتها أربع خمس مرّات

وعطيتها بوسه بـْ حسن نيّه؟

****************

(( أيوب ))

عبدك أنا يا رب مش أيوب

جبال الصبر عالقهر عمبتذوب

بسيارتي عطلان قفل الباب

ودولابها صرلو شهر مضروب

الخليوي معطوب قبل الـ (لاب)

والهاتف الأرضي بكبل مسحوب

بقاظان حمامي انفتح مزراب

وبظن فيش الكهربا معطوب

وعا سيرة التيار يا حباب:

لا كهربا.. والمي لا منسوب

وهرهر دهان الباب والمحراب

ومتلو السقف بالمطبخ المنكوب

مابين خبز وتدفئه وطلاب

صار الدسم من راتبي مسحوب

وعاطلعة الدولار هالسللاب

شوعاد يعمل راتبي المزروب

للتدفئه ماعاد في أخشاب

صرنا عخشبه نحسد المصلوب

عاحالنا تقططع وتر زرياب

وبرناردشو يسخر من المكتوب

وعمتسألوني ليش شعري شاب

والذهن شارد والعقل مسلوب

****************

زياد عطالله سطاح



__________________
الأرض التي تقع عليها متـألماً

عليها تتكئ وتقف من جديد
رد مع اقتباس

Sponsored Links