عرض مشاركة واحدة
  #17  
قديم 1st March 2010, 09:20 PM
samar dahi samar dahi غير متواجد حالياً
مشرفة منتدى المجتمع
 
تاريخ التسجيل: Oct 2003
الدولة: zaidal
المشاركات: 624
الجنس: انثى
samar dahi is on a distinguished road
رشوش :
وصفي شعورك بأول مرة بتشوفيفيها ابن عصام خصوصا انو مرّ فترة طويلة ماشفتو حدا منوب من بيت عصام بسبب ظروفمعينة؟ يعني عم استفسر لأنو رح شوف بنت اختي بعد فترة قصيرة ولازم اعرف مين عندونسبة الجنان الأكبر ههههه!!!!
آآآآآآآآآآآآآآآآآآآآآآآخ يا رشا شو ما قلت قليل عن شعوري وقتها ...فيكي تسألي سهير شو صار في بالمطار وقت حضنتو لأول مرة بعد انتظار 10 سنين ...
من اكثر لحظات حياتي اللي ما بقدر انساهم ...
وقت شفت جان اختلط بداخلي مليون شعور خلاني ابكي بطريقة ما بكيتها إلا يوم خبرت بمرض سناء لدرجة اني ما اعرف اهدأ ...مشاعر حنان وعاطفة ما بينوصفو ....شفت بجان عصام وسامر اللي مشتاقتلهم شوق غير طبيعي شفت فيه حنان الأخوة اللي انحرمت منو سنين شفت فيه حب الإبن اللي ما عرفتو من قبل شفت فيه حب أهلي كلهم لبعضهم ...طلع فيه وما اقدر صدق انو هو بين ايدينا ومعنا ..واللي زاد مشاعري يا رشا انو حرق قلبي كيف جاي لوحدو بدون اهلو فيمكن هالشي خلاني اعطيه كل حناني لدرجة نسيت فيها حالي وكل الناس اللي حولي حتى اهلي .....
يا رشا ما رح اقدر كمل معليش .....؟؟؟؟؟؟؟؟؟؟؟؟!!!!!!!!!!!!!!!!
ليكي يا رشا سؤالك فجر بداخلي احاسيس ومشاعر إنت عارفتيها تماما وعارفة شو تسألي ولكن اكيد يا رشا وضعك وقت بدك تشوفي زيزو غير وضعي لانو نحن طال انتظارنا وجان جي لوحدو هاد لوحدو كان شي ما بتقدري تتصوري شو عمل فينا
وانشالله بتلاقي زيزو ورنوم وحسام قريباً والرب بيجمعكم اخيرا ...رح شوقك وحرقصك زيزو بتجنن وصايرة صبية وبتعرف ترقص كمان ...عينك تشوفها ولا كل الصبايا ...

قال لي أحد دكاترة الجامعة ذاتيوم قبل امتحان صعب نوعا ما: "أعرف تماما أن شعور الخوف يتملكك قبل دخولك لامتحاناتمادتي, لدي نصحية صغيرة لك من أجل هذا الصف والحياة بشكل عام, تذكري دائما أن الخوفهو أهم أسباب الفشل" فهل الخوف موجود في حياة سمر؟ هل تظنين أنه عامل ايجابي أم سلبي في مراحل تطور الشخصية؟ وهل تؤيدين استاذي في نصيحته؟
طبعا موجود ...الخوف الو اوجه كثيرة منها ايجابي ومنها سلبي ومنها حيادي ما الو تاثير مباشر على نمو الشخصية
لحتى كون واضحة رح اعطيكي امثلة
الخوف السلبي : خوف من مواجهة الذات وأخطائها . خوف من الدخول في تجارب جديدة اجتماعية عاطفية عملية . الخوف من اختبار الذات بكل جوانبها وبيندرج هون الفحص اللي عم تحكي عنو .
الخوف الإيجابي : الخوف على سمعتك كبنت . والخوف من الشر بهالدنيا . الخوف من الفشل بمعناه الإيجابي اللي بحفز وما بيحبط . خوف الأهل على الأولاد . خوفنا على اللي منحبهم
الخوف الحيادي : وهون فينا نقول هو شعور باطني بداخلنا ما منحس حقيقة فيه ولكنه بالعمق هو موجود مثل الخوف من فقدان الصحة بدون ما يكون وسواس . الخوف على الأهل بأنك تفقد حدى فيهم
والأمثلة كثيرة وفينا نخصص موضوع مشان هالشي لحتى نبحث بهالموضوع بتفاصيله

يلومني المقربون مني علىع صبيتي والتي لا أراها مبالغ فيها؟ إلى أي حد أنتي انسانة عصبية؟ ماهو منظورك للهدوء؟
انا ما بين بين ما عصبية ولا هادية إنما الموقف بيفرض حالو علي , احيانا مابتحمل وفورا بعصب على اشيا سخيفة بعين الغير وبكون هادية كثير على مواضيع يمكن تعصب غيري ....فانا انسانة طبيعية يمكن ماني مريضة نفسياً ههههههههههههههه والهدوء دايما ما بحبو بحس الواحد لازم ينفعل ببعض المرات , والله مو مقبول الهادىء دوم , واحيانا هدوء بعض الناس بيقتلني وما بتحملو ههههههههههه

بما أنو جبران من المقربين لقلب سمر, بتمنى لو تكتبي كم سطر بتلاقيهن معبرين وقريبين للقلب من كتابات جبران؟
بين ايدي هلق الأجنحة المتكسرة رح اكتب كم جملة منها كثير بحبهم
(للشبيبة أجنحة ذات ريش من الشعر واعصاب من الأوهام ترتفع بالفتيان إلى ما وراء الغيوم فيرون الكيان مغموراً باشعة متلونة بألوان قوس قزح . ويسمعون الحياة مرتلة اغاني المجد والعظمة , ولكن تلك الأجنحة الشعرية لا تلبث أن تمزقها عواصف الاختبار فيهبطون إلى عالم الحقيقة , وعالم الحقيقة مرآة غريبة يرى فيها المرء نفسه مصغرةً مشوهة )
( للجمال لغة سماوية تترفع عن الأصوات والمقاطع التي تحدثها الشفاه والألسنة , لغة خالدة تضم إليها جميع أنغام البشر وتجعلها شعوراً صامتاً مثلما تجتذب البحيرة الهادئة أغاني السواقي إلى أعماقها وتجعلها سكوتاً ابدياً إن الجمال سرٌّ تفهمه أرواحنا وتفرح به وتنمو بتاثيراته )
( إن النفس المتألمة تجد راحة بانضمامها إلى نفس أخرى تماثلها بالشعور وتشاركها بالاحساس مثلما يتأنس الغريب بالغريب في أرض بعيدة عن وطنها , بالقلوب التي تذيبها أوجاع الكآبة بعضها مع بعض لا تفرقها بهجة الأفراح وبهرجتها , فرابطة الحزن أقوى في النفوس من رابطة الغبطة والسرور , والحب الذي تغسله العيون بدموعها يظل طاهراً وجميلاً وخالداً )
( إن المحبة المحدودة تطلب امتلاك المحبوب أما المحب غير المتناهية لا تطلب غير ذاتها , المحبة التي تجىء بين يقظة الشباب وغفلته تكتفي باللقاء وتقنع بالوصل وتنمو بالقبل والعناق , أما المحبة التي تولد في أحضان اللانهاية وتهبط مع أسرار الليل فلا تقنع بغير الأبدية ولا تكتفي بغير الخلود ولا تقف متهيبة أمام شىء سوى الألوهية ..)

بين شعر قريتي وأثر فيكي لحدكبير؟
في قصيدة بحبها كثير للشاعر الياس نويران (ابو سميرة ) وبعتقد اغلب الناس بتعرف مطلعها وهي موجودة بموقع زيدل ولكن مو كاملة فهي فرصة لحتى نضيفها هون على الموقع مع الإهداء من الشاعر ( الله يرحمو ) اللي هو طبعا من اصدقاء ابي المقربين فلنستمتع مع بعض بلحظات التغزل بزيدل وتدريجات يوم الأحد في كرم الرفيع ويا ريت زيدل بتعود لسابق عهدها الذي لم نعرفه ونشهده :
الإهداء : إلى ذكريات بعيدة خالدة خلود الروح , إلى عهود مزقتها طوارق الحدثان فسقطت في هوة الأبد . إلى الأرواح التي غيبتها ظلمات القبور فطوتها يد الإنسان الحي حيناً ليلحق ركبها بعد حين . إلى جيل غابر وآخر حاضر إلى شباب طبع كيوبيد قلوبهم بختمه المقدس , إلى شباب قريتي زيدل أهدي هذه الأنشودة المستوحاة من صيف زيدل المشهور بتدريجات يوم الأحد على طريق الكرم :

طل المسا يوم الأحـد مشهور في زيـدل الخضراء ضيعتنا


وتجمعـوا الحلوات مثل بدور يتمشوروا عـدروب كرمـتنا


عناقـيد جفنات الكـرم بـلور منـها شربنـا دوم خمرتـنا


يا ما سكرنـا بالفرح وسـرور وتـرجّع الوديـان دبكتـنا


وياما إلى كـرم الرفيـع نزور وحلوات معـنا تطول سهرتنا


حتى الشمس تغطس بقلب بحور والبـدر يضـوي جـو حقلتنا


والطير والشحـرور والعصفور يتغلغلـوا بأغصـان لوزتـنا


وعـرزال مبني يسكنو الناطور فوق التـلال بجنـب تبنتـنا


وهناك فـوق الرجم بين صخور تسـمع إلى همسات جارتـنا


لابسـي فستان كـلّو زهـور سرقت لوانـو مـن جنينتـنا


يا ( ورود ) زنبق فل مع منثور في شكلـها يا ربـع فتنتـنا


بنـيات معها عرفت منهن لـور وشمسي وليلى بنت حارتـنا


ليـلى جميـلة اسمـها مشهـور أجمل فتـاة بكـل قريتـنا


جدّا قـزني سـبع أو زكـور القصـد إنـها بنت بلدتـنا


أو يازجـي أو صفـر أو فاعور حلوات كلهـن من حمولتنا


الشعـر فـوق كتافـها منـثور وعيـون مثل ثـياب كهنتنا


والعنـق عنـق الريـم فيه نفور ونهديـن تتحدى شراهتـنا


فيهم شـراب معتّـق ومخمـور والريـق من نخروب نحلتنا


تبـرم علـى رفقاتـها وتـدور وغمـزاتها بالقلـب جرحتنا


هبّت عليـنا ريـح فيـها عطور رحـنا وقفـنا بعد مشيتـنا


مروا عليـنا مـثل رف طيـور يتنقلـوا بساحات روضتـنا


سحر الحـلال الكامـن المحشور كانت ظفر قهرت صلابتـنا


سرنا وراهـم مثـل شي طابور وأقدامـنا مـا عـاد لقيتـنا


والقمـر يعـلا بالسـما والنـور يخرق شعاعو سجف عتمتنا


ونجمات راحـت بالفـلك بتدور وأنفـاس تنهيـدات غمرتنا


والكـرم يضحـك زاد فيه حبور زادت حلاتو مـن حلاوتنا


كـرم الرفيـع مدلّـه ومسحـور مسلوب عقـلو مـن صباتنا


لا زلت يا كـرم الهـوى مغمور بخيرات تكمـل فيك بهجتنا


ونبقى مـع الحـلوات إليك نزور وفي كـل عام تكون جمعتنا


يا كـرم لا تشـهد شهـادة زور عيـب الشهادة في ديانتـنا


لا تقـول إنك شفت مـاري ولور ومحفوض يقطف عنب جفنتنا


بكرا الصمـد والفـاس والمعذور بنظّفـوا آثـار خطوتـنا


لكـن غرامـك بالقلب محفـور مش راح يمحي من قرارتنا


إنت مفضّل عليـنا وقصـور وهيكل مقدس فيك ركعتـنا


هيكل قرابينك قلـب منحـور كيوبـيد يتجـلى بخيمتـنا


يا كرم خلي سـرّنا مطمـور لا تفضحوا بتسود عيشتـنا


من بعد ساعات الصفا وسرور والقمر يتـهادى عمشيتـنا


رجعنا وآهات الولـه بصـدور تنفث لهيـب تزيـد حمّتـنا


كل شب في راسوا ألف ساطور وشيـطان عميلهب حماستنا


وصلنا بـيادر قمحـنا المشهور ونسمات عمتذري ذرايتـنا


وحيلان عم يشكي الندى المنثور تحت القشاق وفوق طرحتنا


طال الدراس الزرع صرلو شهور سـودّت لوانـو من نداوتنا


ومـذرا تـذري والتبـن منثور وإيمت نخلص صنت عرمتنا


وصلنا البـيادر والتبـن مطيور تعبّي بشعرنا وجـور رقبتنا


وصلـنا عخندق بالتبن مطمور غرقـت بقلبـوا بنت جارتنا


والمعركي دارت على المستور بين القـلوب بضـو قمرتنا


زيدل يا أجمل ريـف بالمعمور فيكي الكرامـة فيكي عزتنا


صيتك غدا بين الخـلق مشهور صنـتي وصـنّا لا كرامتـنا


فيك جـمال مكمّـل ومحصور ممنوع يذهـب مـن منابتـنا


يا أحد يا ذكرى خلاص ونـور يا أحـد إنـت دوم بهجتـنا


طـلعاتـنا واعـراسـنا بتـدور يـوم الأحد تاريـخ ضيعتنا


دمشق في 21 / 5 / 1964


الياس نويران


غنية بتحبي تسمعيها بصوت عصام, ترتيلة بتحبي تسمعيها بصوت عصام؟
يا رشا دايما بتحطي ايدك ع الجرح وتسألني عنو , انو معقول قلك شي معين من اللي بقولو عصام ....كل شي بغنيه عصام بحبو وكل شي برتلو ...ولكن اكثر اغنية بحب اسمعها منو ( سليمى ) وأكثر ترتيلة كان يقولها بصلوات التأمل بالكنيسة القديمة ( ارحمني يا الله

معي سيدي فاضي وبدي سجل عليه 10 اغاني منوعات من أغاني الزمن الجميل لحد هاللحظة؟ تفضلي واختاريلي هالأغاني على زوقك؟
ما بعرف اذا بدو يسع السي دي تبعك للأغاني رح حط فقط أغاني الزمن الجميل:
1- انت عمري - أن كلثوم
2- يا وردة الحب الصافي - عبد الوهاب
3- عش انت - فريد الأطرش
4- اشتروني - وردة
5- مشغول عليك - كارم محمود
6- وحشتني - سعاد محمد
7- رح حلفك بالغصن يا عصفور - وديع الصافي
8- وردة وزهرة - زكي ناصيف
9- سليمى - زكية حمدان
10- زي العسل - صباح

شو تقييمك للدراما السورية, المصرية, الخليجية بالوقت الحالي؟
الدراما السورية عم تجتر نوعا ما نفسها ببعض الأعمال وعم تتطور بأعمال أخرى ولكنها الأولى برأيي اليوم على المستوى العربي
المصرية : طول عمرها الدراما المصرية مسيطرة على العالم العربي واليوم بسبب الدراما السورية تراجع اوجها وتألقها لدرجة انو الواحد فينا ما عاد الو خلاق يتابع مسلسل مصري
الخليجية : عم تحاول تشق إلها طريق وما بعرف اذا بتنجح

أحلى مسرحية, فيلم حضرتيهن؟
بصراحة ماني من متابعي المسرحيات ولكن مسرحيات عادل إمام ودريد لحام هي المسرحيات اللي بعرفهم وكلهم الهم نفس المستوى عندي
أما الأفلام : أكثر فيلم حبيتو بحياتي قديم اسمو ( ghost ) لديمي مور

بتسمعي شي اغاني غربية؟ اذاكان الجواب نعم ياريت تعطيني اسماء اغاني ومغنين اجانب؟
ما بسمع كثير واللي بعرفهم اغلب الناس بتعرفهم ولكن بحب الأغاني الفرنسية واذا لسا بتذكر شي من الفرنسي فهي هالأغاني واكثر أغنية بحبها اسمها (et si tu n'exsite pas ) لجوداسان

صرت سمعاني شي مليون مرة انوروحة المغتربين بالصيف عم تعمل نوع من العبء من ناحية الوقت بالنسبة لأهل الضيعةومابتصدقو ايمتا ليرجعو وترجعو انتن لقواعدكن سالمين؟ اشرحيلي هالتناقض الكبير بينمحبتكن لهالمغتربين وبين العبء اللي عم تحسو فيه؟ اني حاليا زعلت واخذت على خاطريولازم ترضيني, اختاري شي طريقة حتى حضرتي ارضى؟
رشا القصة مش قصة مغتربين إنما الوضع العام بالصيف هو الكريه , ضغط نفسي بالفعل كبير بسبب كثرة المناسبات واللي عم يصير بانو كلها عم تتراكم لحتى يجو ا المغتربين فالواحد منكم لا بياخد حقو من ان يشبع من اهلو وناسو واقربائو ولا نحن عم نشبع منكم مثل ما لازم , والحقيقة الوضع بالصيف لازملو تغيير لحتى نعرف نعيش معكم وتعيشو معنا بشكل طبيعي اكثر شوي ...فيك تشوفي المغتربين اللي اجوا بالشتاء اديش فرق عليهم الوضع , احلى بكثير صدقيني لانو القعدات الحميمية الحقيقة بتكون اكثر وصادقة اكثر ..بالصيف بحس كل شي عم يتزيف بطريقة ما ...لا تواخذوني بهالكلمة .
والله يا رشا انت بالذات ما بعمرنا حسينا فيك غير رشا اللي منعرفها ولهالسبب نحن عم نكون معك مثل ما نحن ولهالسبب بدي قلك انت بتجي بكل وقت وايمتى ما بدك ورح نكون مبسوطين منك فلا تزعلي ولا على بالك ورح نراضيكي بشي قعدة ارغيلة عندكم بالبيت على الفرندا ههههههههههه والله ملا مراضاي ههههههههههه

وقت الشب بقرر يخطب ويكمل حياتو مع شي بنت حلال, هوي واهلو بيبلشو يبحبشو وطبعا أول مين بيلفت نظرهن هنيالبنات الحلوات؟ ياترى رح يجي شعر عصر ونطلع برّات هالإطار؟
والله بزيدل يمكن صعب حالياً ولكن في بوادر تفكير شوي صح عند بعض الشباب وانشالله خير ولازم يا رشا يكون عند البنات رغبة حقيقة بانو يبنوا داخلهم مثل خارجهم فما يكون شي على حساب شي . فالمجتمع حتى يصطلح بدو تعاون من الكل لحتى نوصل لصيغة صح وتفكير صح بمجتعمنا

سبق وسألتيني شو هوي الجمال اللي منسكت عنّو, هلأ انتي خبريني؟
جمال الروح لأنو الوحيد اللي ما بينشاف واكتشافه اجمل بكثير من الكلام

برأيك ممكن يستحق الإنسان لقب مسيحي حقيقي بدون مايقرا الانجيل؟ ليش؟
ما بدي نقسى ونقول ما بيستحق ينقال عنو مسيحي ولكن في ناس كثير خيرين بالحياة وعايشين حياتهم حقيقة حياة ميسحية بالفطرة ويمكن ما يكونوا مؤمنين بحياتهم وما بيقرؤوا الكتاب المقدس ولكن فينا نقول عنهم مسيحيين غير ممارسين

ولناعودة
عودة شو ؟؟؟؟؟؟؟؟؟؟؟؟؟؟؟؟ ولسا بدك تسألي ........

ملاحظة: بجوز نمدد فترةالتحقيق معك اسبوع ثاني في حال سرعتك بالرد ضلت على هالمعدل
ليكي رشوش لو ساجنيني عن جد فترة التحقيق بشي سجن انفرادي مشان رد على اجوبتكم براحتي وبهدوء أهون من أني انحط بهالوضع واضغط حالي كل هالقد مشان ما اهمل ولا سؤال ...فما بتتخيلي شلون عم اسرق الوقت او المنتدى عم يسرق مني الوقت مشان اقدر لحق على كل شي ...فشو تمدديلي الله يستر عليكي ...

مع حبي واحترامي
رشاعواد
وإلك الأكثر رشوش والله يديم هالروح الحلوة
__________________

في الليل التمست من يحبه قلبي...وفي حديقتي القاحلة جعل مكسنه
وبلآلىء الندى كسا وجهي
نفسي جميلة ...وحبيبي يناديني
هلمي يا جميلتي ...هلمي إلى حديقتي
فالشتاء قد مضى ...والكروم ازهرت ...وأفاحت عطرها



رد مع اقتباس

Sponsored Links