[سالم عبد العزيز]

جَهْلان
========
بقلم هاني الحركة
============

شو حْلِمْتِ كون الأوّل بصفّي = لكن أنا بالصفّ ع الحفّي!!
وبالرّغم إنّي مش ولد كسلان= مّني عَمِ اتْقَدّم ولا نتفـــي !!
شو صابني وشو اللي جرى لي وْكان = حتّى مَ عادْ لي عَ الدّرس لَهْفي ؟!
يمكن لأنّي واقع .. وعشقان = شقرا صَبيّي بالحَلا تِحْفِـه
عقلي انسحر فيها وْصُرُتْ وَلهان = وْمُخّي صُفِي يابس فَرِدْ شقفي
ويمكنْ لأنّي غاطس وْغرقان = بالشَّعْر ، بالعينين ، بالشّفّي
فكري انشغل بالو،وْضربني جْنان = والحبّ يا خيّي مَرَضْ مخفي
والحبّ لو فاجأْ قلبْ إنسان = حتى وَلَوْ شي نهار بالصّدفي
بْيشغل كيان الراشد الفهمان = وبيحطّ عقل الرّاس بالكفّي
كيفْ وأنا اللي مْراهِق وْجَهلان = مأكّد رَحِ بْكُون الأخير الطشّ
وْبالصفّ ما تارك حَدَا خَلفي

****
***

**

اهلا وسهلا بالصديق العزيز الشاعر هاني

عودة حميدة وقصيدة جميلة

تحاياي