موقع زيدل الصفحة الرئيسية  

العودة   منتديات زيدل > المنتدى الزيدلي > منتدى المجتمع > مواضيع اجتماعية

إضافة رد
 
أدوات الموضوع تقييم الموضوع انواع عرض الموضوع
  #1  
قديم 4th July 2008, 04:41 PM
الصورة الرمزية ابن الحياة
ابن الحياة ابن الحياة غير متواجد حالياً
عضو بارز
 
تاريخ التسجيل: Jul 2007
الدولة: سـوريا المقدّسة
المشاركات: 148
الجنس: ذكر
ابن الحياة is on a distinguished road
يوميات حمصي..

يوميات حمصي..

(خاص للحماصنة)


الحلقة الأولى:
ما تراه حين تسير في حمص...


إي يا أخي الحمصي خلينا نبلش الرحلة من زيدل..
بعد ما تضل مستني الميكرو نص ساعة لحتى يمشي وإذا أسرع بيمشي عشرة المهم ما بدنا نكتر حكي عالميكرو لأنو رح إطرح موضوع الميكروات والسرافيس بحمص بوحدة من اليوميات..
المهم يا عزيزي بعد معاناة شاقة مع الطجطجة والطبطبة وارتجاج الشعور ما بدنا ننزل بالأرمن ولا عند دوار المواصلات خلينا قاعدين لعند جامع سيدي خالد..
بتنزل هنيك يا صاحبي وبتمشي ع حيط الجامع وهنيك بتشوف البلاوي وبتصير تترحم ع سوق العراقية اللي كان عامل الجامع مجمع تجاري لكل شي معقول تلاقيه عالبسطات.. قدام الجامع من جهة الغرب يعني ع طريق حماه بيستلمك واحد شايل بإيديه التنتين عشرات الموبايلات وبالله وبلا الله بدو يبيعك واحد وعاد بيكونو كلن من هالنوعيات العايفة حالها أو مستعمل من شي قرن يعني يمكن نابليون كان يحكي فيه وما بعرف يعني مين بيشتري من عندون؟؟؟ وبتطلع حدو بتلاقي بسطة ساعات وبتلاقي وكالة (كريستيان ديور) ع بسطة مع واحد عارضلك أشكال وألوان من العطور والمسابح وقدامهن بتلاقي طرطيرة لواحد معاق فارش صور لهيفا وهبي ووفيق حبيب وستار أكاديمي مشان يشجع الشباب الصاعد على الاهتمام بالفن الراقي!! وبتمشي شوي لقدام لعند موقف سرافيس الزهرة بتلاقي عربيات غراض من أبو العشر ليرات وحواليهم كتر العالم، وشوفيرية الزهرة عم يخمسّو بهالسرافيس وبيروحوا يفوتوا فيك، وحدّن فيه أكثر منظر حضاري ممكن تشوفه.. حاويات زبالة والزبالة اللي حواليها أكتر من اللي بقلبها وهاد منظر بيتكرر معك بغير مناطق من حمص.. وإذا اجتزت هالأزمة بأمان بتمشي باتجاه الساعة القديمة والسوق.. وعالطريق بتشوف المصايب.. كل أشكال وأنواع الناس بتفوت فيها بهالمرحلة من طريقك وبتشوف عجيان ما بيجي عمرن عشر سنين ماسكين سواكير وعم يدخنوا مفكرين أنو الدخان بيكبرن.. واللي بيقرفك وبيقززك لما بتمرق شي بنت حلوة بالغلط وقتها بيصيروا هالشباب (والرجال الكبار حتى) اللي شكالها غلط يطلعوا بهالبنت وبيروحوا ياكلوها بعيونون وكأنن مانون شايفين بنت بحياتن؟؟؟
وإنت ماشي بهالمرحلة بيتعزز الحس الفني عندك لما بتشوف كل محلات السيديات والكاسيتات المعتبرة هون وأرقى غنية بيحطوها متل (هيدي هيدي) (غنية بيعرفوها الحماصنة) أو هيك شي.. يعني أرقى فنان بتسمعو عندون بيكون شي جاسم العبيد أو سارية السواس أو.... وفوق واحد منهن بتقرا (يوجد لدينا الحلقة الأخيرة من سنوات الضياع مع الموسيقي) وأنا يا شباب بصراحة ما عرفت شو هاد سنوات الضياع إلا من هون بالمنتدى وعرفت أنو غزو ثقافي آكل عقول العرب متل ستار أكاديمي بإيام عزّو..
ومرة يا صحابي لزمني سيدي لمرسيل خليفة وغلطت وسألت واحد من هالمحلات ولا بيقللي صاحب المحل (ميييين؟؟) يمكن فكرني عم سبّو..؟؟
وبتتابع مسيرك لحتى توصل لعند السيتي سنتر وهنيك بدك جوانح لحتى تقدر تطير وتمرق من عشرات العالم اللي عم يستنوا الباص أو متل ما بتصحلو إختي (علبة السردين..) وبعد ما تطير بتهبط فوق الساعة وبيصير قدامك خيارين:

1- إما بتكفي باتجاه السوق: وبهالحالة بدو يصادفك التالي..
بدو يصيبك تلوث ضجيجي وصرع من تداخل أصوات الشباب الطيبة تبعوت سوق الخضرة( يالله عالبندورة... قطر يا جبس... إلخ..) وهنيك بنفس المحل بتحس بمعنى الأزمة الغذائية لما تشوف العالم عم تطلع فوق بعضها قدام سيارة مخبز الوعر لحتى تجيب ربطة خبز.. وقبالهم بتلاقي حد بسطات الدخان وعمك أبو جلال (بائع دخان مخضرم) بتلاقي الشباب بياعين الزنانير وإذا بدك تشتري واحد بيدقك ياه بشي سعر خيالي بحجة أنو غلي المازوت..(ما هوي الزنانير بتمشي عالمازوت..؟؟) وبعدها بيستلموك صحابنا اللي بيوقفوا ع مدخل سوق التهريب وبيجي واحد بيعبطك وبيقلك (قلي شريك.. شو طلبك؟.. جينزات كنزات أجهزة..) وإذا كانت إمك داعيتلك بتقدر تخلص منو قبل ما توصل على مدخل سوق المقبي.. وهون يا بتفوت ع السوق وبس خلصتو ورحت ع هالحارات الضايعة بتقرف الأكل لما بتشوف هاللحمة اللي مانها مبينة من الدبّان (الذباب) اللي عليها بعد ما تتفشكل بشي كيس زبالة...
يا أما بتروح باتجاه جامع الأربعين وبتشوف ولاد عم هدول الدبّانات ع واجهة أبو اللبن تبع السوق.. وبلا ما نفوت ع شارع أبو العوف وبياعين الخضرة هنيك والبالة وبياعينها اللي شايفين حالون عالفاضي..

2- أو بتروح من الساعة القديمة باتجهاه الساعة الجديدة عبر شارع القوتلي:
وهون بتشوف شوية ألوان من الحضارة بس إذا تعبت وقعدت بالحديقة قبال السينمات بتبلش تشوف تناقضات المجتمع:
بتتطلع عالسينمات وبتشوف فوق شي فيلم معتبر وتحت عالواجهة الأفلام الثانوية وهي يا بتكون أفلام هندية من اللي ما حدا بيشوفها أو بيكون فيها شوية بنات بس المهم تكون بتشد الشبيبة الصاعدة بمشاهدها الــ......
تذكرت نكتة: فيلم هندي جديد: تنين بيلاقوا بنت صغيرة، بيربوها، لما بتكبر بتطلع إمهن..
هههههههههههههههههههههه..
وبتابع لفة راسك بتشوف بسطتين كتب؟ وبينما إنت قاعد بيجيك شب حليوة أو ولد فريخ من نقابة البويجيي بيستلموك لحتى يلمعولك بوطك أو سباطك.. وحتى لو كان شامواه أو نظيف ما بيحلو عنك!! وهون بتصير تضرب وتطرح إنو ليش هالشب الحليوة عم يشتغل هيك؟؟ معقول ما لقى ولا شغلة غير.. وبتكفى فتلة راسك باتجاه مطعم بيتي وبتشوف مصايب السيارات اللي بحياتك مانك شايفها وإذ بتصف شي مازدا 6 بيضا وبتنزل منها شي بنت حلوي ناكشة شعراتها ولابسة مودرن وحق نضارتها أكتر من كل شي بيطالعو الشب البويجي اللي قاعد بالحديقة.. وحد مطعم بيتى يمّ الروضة وسينما الكندي بتلاقي ولد قاعد ورا ميزان وعم يصيح (وزنك دهب..) وحدو بياع يا نصيب من اللي بتشوفن بجورة الشياح عم يعيّط (ملايين..) وبيجيلك شي شب بيستلمو مسخرة (أديش حق المليون؟؟؟)....

وإذا كفينا بهالاتجاه عالدبلان يعني هه بتبلش تقرب عالحضارة شوي يعني باتجاه الغوطة أو إذا رحت عالحمرا أو الانشاءات؟؟؟
أما إذا كنت طالب مدرسة أو موظف وبتمر من الدبلان الصبح وقتها بتروح هالحضارة اللي عم تدور عليها لما ما بتلاقي الصبح ع زوايا الدبلان غير شباب فلتانين ما إلون شغلة غير يبكّروا يلطشوا البنات الرايحات عالمدارس وبتلاقي أشكالون مميزة بيكونوا حاطين طن جيل وعم يدخنوا بطريقة بيفكروا أنها بتشد البنات أو حاملين شي موبايل من هالجداد وعم يحطوا أغاني أو عم يحكوا معتقدين أنو البنات بيقتلو حالون على هالشغلات...

يالله يا شباب بلا ما نضرب السياحة بحمص.. إسا فيه حارات كتيرة أكيد بتعرفوا مصايبها... أحسن شي نشتريلنا بوظاي من عند الرينبو ونرجع ع خيرلله نطرقلنا سندويشة شاورما ونشدّ ع زيدل..

بصراحة أنا بعرف أنو كمان فيه إيجابيات كتير بحمص بس حبيت إعرض هالسلبيات لأنو هيك هدف موضوعي منشان نعرضها على القليلة إذا ما كنّا رح نقدر نحلهّا..

انشالله تكون عجبتكن وعن قريب الحلقة الجاي وهللي عندو شي بيحب يحطو بيكون أفضل وأفضل...

وتحية حمصية... سلاوم (سلام بالحمصي)...

ابن الحياة..
__________________
I Believe In SYRIA..
رد مع اقتباس

Sponsored Links
  #2  
قديم 5th July 2008, 01:16 PM
الصورة الرمزية ابن الحياة
ابن الحياة ابن الحياة غير متواجد حالياً
عضو بارز
 
تاريخ التسجيل: Jul 2007
الدولة: سـوريا المقدّسة
المشاركات: 148
الجنس: ذكر
ابن الحياة is on a distinguished road
تابع..

الحلقة الثانية:

الميكروات والسرافيس في حمص..


الظاهر أنو مافي حماصنة هوون؟ معقوول؟ ولله مدري ليش حاسس أنو هالمنتدى عم تتدهور حالتو يعني بنطرح مواضيع جدية ما حدا بيرد وبنطرح مواضيع فكاهية كمان ما حدا بيرد؟؟ شو القصة؟؟ يعني شايف أنو ما عم يصير نقاشات إلا بمواضيع الصراعات الدينية والعقائدية؟؟؟؟
وين عمي سليمان، عبدلله، حسام، سناء، الدكتورة مريم، الأستاذ زياد، سمر، عبودي،... وكل هالشباب اللي كنا كل يوم نشوف مشاركاتهم؟؟

المهم بدي كفي هاليوميات على كل الأحوال..

ما بعرف إذا كنتو من روّاد ركوب الميكروات والسرافيس أو التكاسي أو عندكون سيارتكون الخاصة أو بسكليتي شخصيّي؟ طلعوا معي بهالكم ميكرو وسرفيس لنشوف شو بيصير...

1-خط حمص زيدل:
ما بعرف إذا خبرتو أنو ضافو ع قائمة الدفاع عن حقوق الإنسان الحماية من التعذيب بواسطة ميكرو حمص زيدل؟؟ لأنو بهالميكروات بيصير تجارب عن كيفية تسواية الإنسان مكدوس؟؟ لأنو يا عزيزي إذا كنت محظوظ بتطلع من عند الساحة وبتعد بآخر مقعد مشان تلاقي محل (خصوصاً الصبح ع طلعة طلاب المدارس والموظفين أو الظهر ع رجعتهن) أما إذا ما مشي حالك هيك تأكد أنو رح تصير مكدوس لأنو ماشالله شي تلاتين ميكرو عالخط بس ممنوع يطالعو تنين مع بعض أو يطلعوا واحد كل دقيقة بهالأوقات عالقليلة أو يبدلوهن بسرافيس بينتلوا بسرعة.. بس لاء عيييب مابيصير..
المهم أنو بتطلع من الساحة مبسوط ومقبل ع نهار جديد وملاقي محل وبتبلش الجموع البشرية تقبل ووقتها بتحس أنو ع كتر هالعالم ما رح يضل حدا بزيدل، كلهن بيروحوا ع حمص.. وكل ما مشي الميكرو شوي بتزيد كآبتك وإحباطك من هالنهار النحس.. ومشا الميكرو وبلشوا يزيدوا الركاب وإنت وقتها بتفقد أول شغلة من حقوقك اللي بسبع ليرات وهيي محلك لأنك بدك تضطر تقوم لشي صبية أو مرا وهون بتحس حالك بقلب قطرميز وهون بدك تحاول ما تكون طويل لأنك بدك تنمعس من فوق ومن عالجناب.. واللي بيقرف يا شباب إذا ماضل محل حتى لبنت تقعد.. يعني المسؤولين عن الخط بيعجبهن كتير توقف بنت زيدل وهيي عم تتدفش وتتــــ.... بهالميكرو وخصوصي إذا طلعولك هدول البدو حد حرشيلة.. ولله عييييب..يعني لازم حل.. الميكرو خيار فاشل لأنو بأوقات العجقة بيحمل شي سبعين راكب وبيضل يوقف لركاب مشان السبع ليرات (يلعن أبوها) وعاد هوي مخصص لشي عشرين بس؟؟ وبالأوقات التانية بتلاقيه فاضي؟ يعني ما لاحظوا أنو السرافيس ما فيها هالمشكلتين؟؟ وخبرت أنو أهل زيدل بدهن يصيروا ينزلو معون عدة المتي مشان يتسلوا بحمص وهني ناطرين الميكرو لأنو ماشالله بدك تضل واقف شي نص ساعة لحتى يقبل عليك الميكرو مختالاً وهات تلاقي محل.. يمكن لهيك منتشر مرض الدوالي بزيدل؟؟؟
وبيجوك الشوفيرية والله لا يركبك مع واحد منهن وقت أخد الجيش لأنو بيقلب مايكل شوماخر بس مشان يلحّق مفكر معو شي فيراري وكلو مشان الليرة؟؟ وبيجيك كل واحد منون متجهم وما بيضحك لرغيف السخن وكاتبلك فوقو (ابتسم من فضلك)...؟ والملفت أنو مافي غير شي تنين أو تلاتة من زيدل؟؟
ولله يا شباب إذا بدكن الصراحة أنا صرت إقرف إطلع بهالميكروات بس.. مجبر أخاك لا بطل.. يعني بتذكر أول مرة سافرت وطلعت بطيارة ما دخت وجيت من الشام بالبولمان كمان ما دخت بس وقت طلعت بميكرو زيدل فتل راسي..
اييييييييييييييييييه شو إسا بدنا نحكي.....


2-خط طريق الشام:
أول ما بيخطر للواحد وهو رايح عالسرافيس إنّو بس ما يكون في عجقة، متل خط طريق الشام، ويلّي صار خطّو تقريباً من الكراج الشمالي للكراج الجنوبي ،قدّيش بتشوف سرافيس عاالخط مقارنة مع بقية الخطوط بس العجقة عند المواقف موجودة والحلول لسّا ماحدا اكتشفها.
بس الملفت إنّو المواطنين الناطرين عالموقف والشوفيريّي المسرعين بيحكو مع بعض بطريقة خيّو ((شعوذة)) والعياذ بالله، لأنو بتلاحظ حركات إيدين عجيبة يمكن لغة الإشارة،وبعد إحضار خبير لها الإشارات ((واحد من طلاب جامعة البعث)) ،كسلان وراسب وصرلو بيستخدم سرافيس هالخط زمان!!. أكدلنا أنّو هاي الإشارات تم اعتمادها بين الجميع و هي كالآتي :
1- إشارة بالإصبع باتجاه الرصيف المقابلو وبحركتين متاليتين بتعنيّ: ((شو رايح عالجسر؟؟؟؟)) وبتّم الإجابة من السائق بهزة راس مع تمييلتو((إنّو: طلاع))،أوبرفع الإيد بإشارة السلام ((أنّو :لأ)) إذا كان محترم، أوما بيسأل فيك عاالخالص إذا كان أكتر إحترام.
2- إشارة بالايد بحركة مع حركة سير السرفيس بتعني ((شو رايح عالمركز؟؟؟) وبتم الإجابي متل ما ذكرنا سابقا.
للتوضيح: المركز المقصود المركز الثقافي ،والجسر بيعني جسر الجامعة والإشارة بتنعكس اعتماداً على اتجاه الركوب ، ماحدي بيعرف قدّيش صعبة كتابة حركة السرفيس عاالفانوس المعلق عالضّهر وبلا هاالإشارات ، بس محسوبكم عرف: الصعوبة تكمن إنّو الشوفيرية بيتخذوا قرارون حسب ((الأكترية الركابية)) بأول الخط ، يعني إذا كان عدد المتجهين عاالمركز أكتر بيطلع عاالمركز وإذا كان العكس بيصير خط جسر، مشان هيك قدر بعض السائقين الناطقين تلافي الأزمة، ووضعوا على بلورون الأمامي لافتة تحمل عبارة ((مركز وبالقفا جسر)) يمكن لضعفون بلغة الإشارة أو لذكائون المفرط ((نرجوا من المرور تكريمون كونها هيّ يلّي خلقت الأزمة و العشوائية بحركة هاالخط))،صحي كل مرة بيقلبوا اللافتة بس ما بتنزل بنص الطريق لما يقرر الشوفير خط تاني غير إشارتك.
يعني من الآخر الوضع على هاالخط ما بيرضي حتى الحموية ، يمكن باصات النقل الجيدة غالية ووقت قرروا يجيبوا باصات حطولنا 2 أو 3 بحمص من الجداد (وزيادة) وما حلت هالباصات أزمة هالخط..، ((خيو بتعرفوا الحماصنة بدّون باصات طابقين يا ما بيقبلوا !!!!!))طيب زيدوا عدد السرافيس ليكفي الضغط المتزايد عاالخط أو نظموا حركتو وإذا تكرمت الدولة بنفق أو جسر لتخفيف الأزمة المرورية والله مابنزعل !!!!!.
في إشارة تم استحداثها بالمعجم الحديث للإشارات((بعد قانون إزالة المقاعد الجانبية)) وهيّ للسائق عموما :
1- يتم الإشارة للواقف عاالرصيف بالايد من قبل السائق بحركة نص، وبتعني ((خيو في فضى عاالمسند يلّي بضهر الشوفير بيمشي الحال؟!)) .
2-حركة شبر أو إشارة شبرية بتعني ((خيو في فضى قَرفَصى مكان المقاعد الجانبية بيمشي الحال؟!)) يعني بعد إزالة المقاعد لسا الشوفير بدو يطلع الناس بعد امتلاء السرفيس ،والمواطن بدو يركب لو على السقف ، طيب ليش شالت الدولة المقاعد؟ الإجابة كانت : بناءً على طلب المواطنين للمحافظة على كرامتون، يعني مشان ما تنـزل الناس كل شوي كرمال راكب ينـزل ويسكروا المقاعد ويرجعوا يفتحوها ،((ياأخي كرامتون عمبتنجرح)) .
بظل الوضع الحالي يلّي عم بيصير بيرفع راسنا بالحياة عالياً ؟؟؟؟؟!!!!!!!.

3-خط الكورنيش الشرقي:
أما سرافيس خط (الكورنيش) مشكلتهم مشكلة وقصتهم شغلة سألتوني ليش ، لأنّو الشباب خريجي الفورمولا ون،ومقلعين سنانون بالراليات (وطلاب الجامعة اللي من زيدل بيعرفوا..)، وبيبلش السباق ياخد طابع جدي عند دوار المواصلات هون الكل بيشغلوا فقسة التوربو وانتي بتبلش تحس انك باختبار مضاد للجاذبية بسبب الحركات الاكروباتية يلي بيسويها الشوفير المعلم وهوي عم يلفلف بين السيارات وعيونو عاالكاس يلي راح ياخدو بالموقف .
كل هالحكي ولسّا ما طلعنا بالسرفيس ولنعتبر إنك فتحت الباب وطلعت وركبت أخيراً بتلاقي الوضع التالي :
المشكلي الأولى:
إذا كان الراكب جنبك شب يحمل بإيده موبايل حديث شوي إضمن إنك راح تنطرب لتنـزل لأنّو هالنوع من الشباب مصاب برهاب الهدوء ، يعني بيخاف يتوقف الطرب عن الوصول لأذنيه الموسيقيتين للحظة((يا أخي ممكن يصاب بسكتة دماغيه)).
وإنتي بتضيّع بين الأغاني العراقية الحزينة وعلي الديك وهيفا و(هيدي هيدي)....إلخ، وبين مسجلة الشوفير وموبايلات الشباب بتنـزل من السرفيس وانتي عم تحس بالواوا وتبوس التوبة.
المشكلي التاني:
يظهر في أشخاص بيحاولوا يشوفوا قديش فينون يباعدوا بين رجليون مو مشان يحافظوا على منطقتون الجالسين فيها ويعلنوا سيطرتون عليّا لا معاذ الله ،ولا مشان يحصروك ضمن المساحة المتروكي لإلك للجلوس، بس يمكن في حالة مرضية عندون ولازم تعذرون !!!!!!((مرض يابالمخ يا بين رجليهون!!!)).لك حتى لو كانت بجنبو صبية ما بيهمّو وبتلاقيا محشورة بأقصى المقعد ، ناطرة لتنزل وتخلص وساكتي من الإحراج،عيب يا شباب .
المشكلي التالتي:
إذا طلعت بجنب الشوفير كل ما عطاه حدي سبع ليرات بيبلش يحكيلك قصة حياتو عن الوضع العام ،قلة المازوت وتهريبه والنطرة عالكازيات ،مشاكله مع شرطة المرور والخمس وعشرين ليرة المقتطعة من الغلة عند كل توقف بمكان مخالف (ويمكن زادت ع غلاة المازوت)،وهلأ ع حزام الأمان والصندوق الأسود وإنو ليش ما بيحطوا الحزام ما بعرف؟؟ عييب يعني؟.؟ وبيكفي شكوة عن مصروف الأولاد وإنّو التعرفة ما بتكفي لأدنى ضروريات الحياة وعن الركاب اللي ما بيدفعوا وعن الركاب يلّي بينزلوا بعد عشرمتار من توقفو الأول ،وكل شوي بيطلع من الشباك بيسب وبيلعن السائقين الآخرين وعينو على سباقو مع رفيقه عاالراكب التالي.
المشكلي الرابعة:
إذا كنت راكب بجنب سيدة أو فتاة ما، وطلعت سيدة فاضلة بعدك ما بيساعها السرفيس إلا محلك لازم تقوم مشانها خوفاً من جلوسا بالقرب من شاب أو رجل ما لأنّا مصابي بالحساسية من الذكور أو بأحسن الأحوال رهاب المقاعد الخلفية.
المشكلي الخامسة :
النزلة من السرفيس : بما إنّو الصوت معزول ولا يمكن وصولو منك للشوفير بسبب الصوت المرتفع للمسجلة أو كبر سن السائق ،وكونك شاب تبدأ بالصراخ : ((عاليمين لو سمحت ؟)) حتى تصل إلى مرحلة العويل ،ويشفق عليك أحد الركاب القريبين من السائق ويغمغم ((نزلوووو)) كونو إنزعج من صياحك . أما إذا كانت آنسة ترغب بالنزول تقول ((عاليمين )) فيهب نصف الركاب للمساعدة ويبدأوا بالصراخ ((عاليمين- عندك – لك نزّلا)).
المشكلي السادسة:
إذا طلع مواطن وجايب للبيت الخضرة واللبن والبيض ((طبعاً الوضع المعاشي ما بيحمل الركوب بالتكسي))بيبلشوا الركاب يلاحقولو الليمونة الواقعة والبندوراية الفلتانة ويرجعولو إياها بانتصار، وهوي عم يتساءل شلون وقعت ((له له له)).
طيب شو الحل حتى ببلدك مافينك تركب عالبيت بمواصلات مريحة وإنتي محافظ على أكلاتك ؟؟؟.

والوضع ببقية الخطوط مو أنظم يعني خط الزهرا وخط غوطة/وعر وهاد غير خطوط الضيع يعني الثابتية وهيك شي.. بس حاج هدول بتعرفوا مشان السياحة الحمصية.. أما وضع سيارات التكسي فامر عجيب وانشالله بنطرحو بغير يومية..


ملاحظة: فيه شوية لطش مع تعديل..

وإنشالله تكون عجبتكون...

تحية حمصية..

ابن الحياة..
__________________
I Believe In SYRIA..
رد مع اقتباس
  #3  
قديم 8th July 2008, 11:55 PM
abode durra abode durra غير متواجد حالياً
عضو مخضرم
 
تاريخ التسجيل: Nov 2005
الدولة: LA, Zaidal
المشاركات: 208
الجنس: ذكر
abode durra is on a distinguished road
Talking حمصي

شو هاذ يوسف بعد قراءة موضوعك ما حد رح يزور حمص هههههههه اكيد عم امزح

الموضوع كثير حلو و طريقتك بالتعبير و اسلوب الكتابة هوي اللي عجبني اكثر من الموضوع و خليتني انشد للموضوع اكثر و بدي اشكرك كمان على الوصف الجميل للي خلاني حس حالي مرافقك و معك عم نلف بهالشوارع و نطلع بالسرافيس و كل هالاحداث عم تصير معني و هالشي كثير حبيتو

لانو ذكرني بالمدينة و المكريات و هالمشاهد كلهي مرت بذهني و اني عم اقرا و تخيلت البسطات اكثر شي ههههه و حسيت حالي مشتاق لكل هالشغلات مع انو تافهة و ما بتتخيل اديش عم اشتاق لشغلات تافهة من الضيعة هههههه


و كمان بدي قول نفس ما قلت انو مدري ليش هالمنتدى عم يتراجع و وضعو مدهور و ما بتلاقي غير المواضيع و الردود اللي ماشي الحالهي و الردود ما عم بتصير غير على هالمواضيع ال......... و البتضحك و مو دائما مثل ما صار بموضوعك بس ولا يهمك ولا شي بدوم و بكرا بيرجع المنتدى مثل ما كان
__________________
عبودي الصغير

Young Abodi
Zaidal-California
رد مع اقتباس
  #4  
قديم 10th July 2008, 10:36 AM
الصورة الرمزية Nada1981
Nada1981 Nada1981 غير متواجد حالياً
مشرفة المنتدى الترفيهي
 
تاريخ التسجيل: Mar 2005
الدولة: The Netherlands
المشاركات: 1,286
الجنس: انثى
Nada1981 is on a distinguished road

اخ ابن الحياة شكرا كتير على الموضوع

مثل ماقال الاخ عبودي ذكرتنا بكلشي بحمص, حتى لوكانت شغلات صغيرة وماحلوة بس بلنسبة النا شغلات مهمة وذكريات حلوة

يلا اخ عبودي الله كريم وبنرجع بنشوف مدينتنا الغالية حمص

بس ولو, ضربتو السياحة بحمص على الاخير هههههههههههه

تحياتي

ندى
__________________
๑۩۞۩๑ Dream as if you'll live forever, live as if you'll die today๑۩۞۩๑
رد مع اقتباس
  #5  
قديم 14th July 2008, 10:11 PM
a_aroush a_aroush غير متواجد حالياً
مشرف سابق  
تاريخ التسجيل: Aug 2003
الدولة: united states of America
المشاركات: 886
الجنس: ذكر
a_aroush is on a distinguished road
شر البليّة ما يضحك .. فعلاً ضحكتني من قلب بطريقة طرحك لهالموضوع مشكور .. يمكن هي أفضل طريقة لأن نتعامل مع الأمور فالبرغم من انها معاناة لكن الأفضل نتعامل معها بهزلية .. لأن غير هيك رح توجع قلبك عالفاضي و خصوصاً أن مافي نتيجة أو حل .

بدي رد بس على شغلة و هي ليه ما عم يصير تجاوب مع المواضيع و ما عم يصير ردود من الأعضاء .. باعتقد السبب هو أن المواضيع كثيرة و حتى اللي قاعد ما عندو لا شغلة و لا عملة ممكن يقدر يتابعها كلها .. فبتلاقي أعضاء منزلين عشر مواضيع بيوم واحد و يا ريت تعبان على أي واحد منهن إلا جايبهن نسخ من غير مكان و لزقنا فيهن .. و لو حتى حاولت تتجاوب و ترد على واحد منهن هو ما رح يتجاوب معك لأن ما عنده رد يلزقك ياه لزق كمان .

يوم بتلاقي بروس بكهام منزلة عشر مواضيع و يوم بتلاقي فادي حارس منزل عشرين موضوع هي اذا مو اكثر .. و ماني عم بالغ .. و بتلاقي ان هيك أعضاء ما همهن يتناقش اي موضوع من هذول أو ياخذ حقة من القراءة و الردود .. همهن بس يلزقونا قصص و مواضيع و يرجعوا ثاني يوم بمواضيع جديدة .

فكيف بدو الواحد يتعامل مع الوضع السيء هاذ .. و المشكل أن مواضيع الها معنى و متعوب عليها مثل موضوعك هلأ عم تضيع بالطاسة بين هالمواضيع .

اسمحلي شاركك هلأ بمشكلة التاكسي و مشكلة نظام السير .

لو كانت التاكسي فيها راكب بتلاقي الشوفير طاير و مثل ما قلت عامل سباق فورملا ون بين العالم .. و بيدفش هاذ و بيدعس هذاك و ينعر هاذ لحتى يوصل وين رايح و يلحق طلب ثاني .. حتى أنك من المستحيل تلاقي تاكسي مانها مطعوجة مية طعجة من كل جنب .. حتى مرة شفت سيارة ما فيها ولا طعجة حبيت آخذلها صورة تذكارية لأنها قطع نادر .

أما لو كانت التاكسي فاضية من الركاب فالسائق رح يمشي على مية مهله و بتقلب الاشارة حمرة و خضرة مرتين و هو قدامك ماشي على برادة عم يطلع لو في حدا عالرصيف بدو تاكسي .

و لو كانت بامكانك انك تطلع بالتاكسي بدل ما تصير مكدوس بالميكرو .. رح تشوف العجب و فن جديد بالسواقة و نظام سير مو موجود باي بلد بالعالم .. فبدل ما ان السيارة هي اللي توقف للمشاة بالشارع المشاة هني اللي لازم ينتظروا السيارة تمرق .. و لو حدا كان بنص الطريق فالافضل ان يركض لو شاف سيارة تاكسي جاية عليه لأنه التاكسي ما رح توقف بالتأكيد .. لأن شوفير التاكسي عمل اللي عليه و زمرله فضميره رح يكون صافي لو دعسه .. و هالسالفة صارت معي شخصيا و شفير التاكسي كان جوز اختى و عشوي دعس طفلة بالعرباية مع امها ..فالرصيف محشوك بالناس و المسكينة من كثر التدفيش صارت هي و بنتها عالطريق فزمرلها ما ردت عليه .. مو لانها مو سامعته لكن ما عندها حل .. فما كان منو الا ان مرق من فوق الدولاب تبع العرباية و عشوي مرق فوق البنت .. و لكن ما انهز أبداً من الشي اللي سواه و انما على العكس صار يسبلها للمرا ليه ما سمعت زموره .
و أنا هون رحت جن و صرخت فيه و قلته يوقف .. وقف و نزلت لشوف شو صار .. كانت المرا محجبة لكن كنت شايف دموعها و سمعان بكاها من ورا الحجاب .. تأسفتلها عنه و اطمنت البنت ما فيها شي .. و حاولت أعطيها ثمن العرباية اللي نكسرت رجلها .. و لكنها رفضت و هي عم تبكي .. و حسيت اني أصغر انسان بالعالم و أحقر انسان بالعالم .. لأني حاولت اشتري بالمصاري شي فقدته أو خسرته هالمرا أكبر بكثير من العرباية المكسورة .. و حسيت بخجل كبير من حالي .. و صبيت كل غضبي على صهري العزيز اللي كان سبب المشكل .. و لكن بكل الغضب اللي كان ظاهر عليي ما كان يقتنع ان غلط بالأحرى عطاني محاضرة على ان هي الطريقة الصح بقيادة التاكسي و طال بالكلام حتى ما عدت اسمع شو عم يقول لاني فهمت ان الناس مستحيل تغير عقلها عن الغلط اللي تعودوا عليه طول حياتهن .

و قصص كثير مشابه مرقت معي بغير مواقف مع غير شوفيرية .. و ما كنت افهم عقليتهن و لا المنطق تبعهن .. و لكن مين ممكن يقدر يفهم او يفسر هالشي ما بعرف .. فمثلا بتلاقي شوفير التاكسي من اللحظة اللي طلعت فيها و قبل ما تقعد و تسكر الباب بيكون مشي من دون ما يطلع وراه لو جاية سيارة او لاء .. لانه هو حط الاشارة الغمازة عاليسار .. و هون بتحس كيف شعورك مسابق الفورملا ون .. و بتلاقي الطريق اللي معذبين قلبهن و مخططينو خطين ماشي عليه ثلاث و اللي مخطط ثلاث ماشي عليه خمس خطوط .. و لكن احلى شي لما بتوقف كل الخطوط من الزحمة و بيبلش الشوفير تزمير للسيارة اللي قدامه و كأن هي السبب بكل مشكلة هالسير مع انه في قدامه مية سيارة .. و بطبعي ما بقدر ما علق .. بعد ما الشوفير صرعنا من التزمير و هو عم يزمر للسيارة اللي قدامه .. قلته طب شو برأيك يعني يعمل ؟ شو رأيك انه ممكن يطير و يزيح من طريقك ؟. قلي انا ما عم زمرله اله عم زمر للحيوان اللي قدام .. و هو طبعاً ما كان شايف مين قدام باول سيارة و لا ليه واقفين حتى الاشارة لسا مو مبينة علينا لو كانت حمرة او خضرا او زرقا و لو كنا شايفينهي و مبينة حمرة بس وصل العد التنازلي الها للاربعة بيبلش التزمير من كل جنب .

و من الأشياء كمان اللي ما كنت افهما .. لما تكون عم تسوق على اوستراد خطين و ماشي عالخط اليساري .. الخط السريع .. و انت آخر واحد و قدامك طابور من السيارات .. و على يمينك طابور من الشاحنات ملزوقين ببعض ما ممكن تفوت بينهن نملة .. بيجي واحد من وراك عالخط اليساري من بعيد مسرع .. و بيبلش يطقشلك بالضو .. هي الاشارة بتعني انو لازم تعطيه خط ليمرق و تمشي عاليمن لان هو اسرع منك .. لكن يمينك مسكر و قدامك سيارات .. و هو طبعا شايف هالشيء لكن ما بيمنعه ان يستمر بالطقيش بالضو .. و بتحس من شكلة وراك بالمراي ان صار معه عصبي منك .. و رح ينزع اضوية السيارة من التطقيش و انت ما عم تحرك لساك ماشي قدامه .. طبعاً لان ما عندك اي خيار .. و من كثر ما هالشغلة كانت ....ت.....صني.. مرة وقعت بنفس الموقف .. سيارة جاية من بعيد و عم تطقش بالضو و ما كان عندي اي طريقة زيح من طريقة قدامي سيارات و على يميني سيارات .. و لكن ما منعه هالشي من انه يوقف تطقيش ضوه .. و كان مبين ان الشوفير ضابط عسكري .. يعني لازم يكون انسان فهيم شوي اذا كان بدو يقيد جيشنا يوماً ما بحرب ضد العدو و اسلحته الفتاكة .. لكن سند الامة هاذ ما كان يفهم انه كان من الصعب عليي زيح من طريقة لان الطريقة الوحيدة لروح من طريقه هي ان انزل تحت دواليب الشاحنة اللي عيميني .. و طبعا عصّب حضرة الضابط و طقش اضويته حتى لاحظت ان عيونه صارت تتطقش كمان و لزق بسيارتي لزق و عشوي بدو يدفشني بسيارته .. فانا هون فقدت كلشي اسمه فهم .. فهديت سيارتي عالآخر و هو طبعا خفف سرعته كمان وراي .. حتى وصلت سرعتي لقريب الوقفة ..( يعني القصد كان اذا كنت مفلوق نفلق اكثر ) .. و عطيته بايدي اشارة يمكن ما بعرف اذا فهمها باصبعتي الوسطى ... و بعدها رجعت اسرعت و لكن ما عاد طقش ضو سيارته كل الطريق .. يبدو انه فهم الاشارة .

شيء كمان ما كنت اعرف باي نظام سير بالعالم يتبع .. و هو انه سيارة بتوقف على اقصى اليمين و لما بتفتح الاشارة بيسبق الناس كلها و بيلف عاليسار .. و اذا طلع قدامه شي واحد اسرع منه عالخط اليساري و سد عليه الطريق ليمرق عاليسار بيصير يزمرله و يسبلو .. هي ما فهمتها منوب .. حتى مرة تعرضت لنفس الموقف و انا عالخط اليساري وواحد جي من على اليمين عم يلف عاليسار على الشارع المقاطع لما فتحت الاشارة خضرة .. و لما جيت انا بطريقة وقف و وقف معه السير .. فطلعت فيه و انا عم آكل مسبات و زمامير قمت وقفت بنص الشارع حتى ما يمرق هو .. و لما حاول يملص سكرت عليه مرة ثانية الطريق حتى اضطر يمشي طول و يروح يلف من غير شارع .... ههههههههه . وهون عن جد حسيت اني ربحت جائزة كبيرة.. جائزة التجحيش هههههههههه .

و لو حبيت احكي بعد اشياء كثير منعمل منها مجلد ..

عذبو حالهن و عملوا قانون سير جديد بسورية .. و كأنه هني بيعرفوا نظام السير القديم لحتى يفهموا الجديد .

شكرا على موضوعك .. و بالتأكيد ما رح يكون في اذان صاغية بس خلينا نفش خلقنا احسن ما نطق مو هيك .

بالتأكيد ان السياحة ما رح تتأثر بحمص بسبب هالموضوع لان اصلاً هي مو مقطعة حالها بالسياح .. و نلقيت سايح بيطلع من الكويت او من السعودية .. و بيطلعوا الحماصنة عند هذول افهم بكثير .
__________________
there is no place like home
رد مع اقتباس
  #6  
قديم 14th July 2008, 11:26 PM
الصورة الرمزية Elie Swed
Elie Swed Elie Swed غير متواجد حالياً
مدير عام و مشرف المنتدى الإداري
 
تاريخ التسجيل: Aug 2003
الدولة: zaidal
المشاركات: 1,388
الجنس: ذكر
Elie Swed is on a distinguished road

والله يا يوسف وأنا عم أقرا كتاباتك ما يجيني غير الضحك فعلاً إن شر البلية ما يـُضحك متل ما قال عبد الله, أهنيك على سرد هذه المشاكل بروح تنم عن المسؤولية وبقالب يبتسم له القلب بكل بساطة, ننتظر منك متابعة الحلقات ولا تنتظر ... فهي جميلة بحق, الحمد لله أنه ما زال هناك شبابٌ لم تغيبه الحياة وهذا ما أراه جلياً في بعضكم ........ بانتظار أن نقرأ متابعة الحلقات ......... سلااااااااااااام أيها الطيب :



الاســـم:	1.gif
المشاهدات: 613
الحجـــم:	39.9 كيلوبايت

حبيب العمر

__________________
الأرض التي تقع عليها متـألماً

عليها تتكئ وتقف من جديد
رد مع اقتباس
  #7  
قديم 15th July 2008, 06:04 PM
الصورة الرمزية ابن الحياة
ابن الحياة ابن الحياة غير متواجد حالياً
عضو بارز
 
تاريخ التسجيل: Jul 2007
الدولة: سـوريا المقدّسة
المشاركات: 148
الجنس: ذكر
ابن الحياة is on a distinguished road
أول شي بحب أشكر كل اللي ردوا وبصراحة ما كنت ناوي كفي الموضوع بس الأخ عبدلله حكى اللي كلنا حاسين فيه عن أوضاع المنتدى، لهيك قلت خلينا نكفيه بما أنكم حطيتوا إيدكم معي وانشالله بنشوف خط الكل متل ما عمل عبدلله لأنا بتجمعنا الحمصية وبتهمنا مصلحة حمص ولا شوووو؟

بصراحة اليوم أنا جيت من دمشق وكمان هنيك فيه بلاوي، أبسط شي أنو شوفيرية حمص كبروا بعيني لأنهم عالحق لأنو هون عالقليلة إزا عطيتو للشوفير عشرة بيرجعلك تلات ليرات أما هنيك بيطنشك وكأنو التلات ليرات مو مهمات وما بينحكى فيهم...

كنت ناوي جهّز حلقة عن التكاسي بس الأخ عبدلله وفر عليي شوية حكي بقا رح حط هالكمّ شغلة اللي خطرولي عالتكسات وبدون رقم حلقة مشان نشارك كلنا باليوميات..


رحلة في التكسي..

إذا الحمصي الله مأنعم عليه ومزنكل شي نهار بيقرر يطلع بتكسي (مشان يحس بمعنى السعادة بالحياة).. بس قبل ما يطلع فيه كم مشكلة بدها تواجهو:
1-إيجاد التكسي: لأنو يا شباب بتعرفوا الحماصنة ما بيرضوا يطلعوا بأي تكسي لهيك بيضل الحمصي عم يستنى لحتى تجيلها شي سيارة متل الخلق (شي كيا ريو مسلاً) لأنو ما عاد تعبي عينو السابا واللادا.. وهون يقف الحمصي أمام مشكلة جديدة بإيجاد التكسي وهي الفانوس، يعني كيف بدو يعرف كنو التكسي فاضية ولا لاء لأنو ماشالله شوفيرية التكسات ما بيعرفو يغيرو ضو الفانوس يعني يا دوم أحمر يا دوم أخضر وتعا فسّر وقتها إيمتا بتكون التكسي فاضية وهاد إذا ما كانوا ضواوي الفانوس محروقات..
2-الأجرة: إذا لقى الحمصي التكسي الفاضية اللي ع زوقو فيه عندو خناقة ضغيرة قبل ما يطلع مشان الأجرة والأجرة يا شباب قصتها قصة وهي بتتناسب طرداً مع البعد وإذا حدد السائق رقم عالسريع بيطرقو الحمصي أقل من هالأجرة بثلثها وبيبلشوا يتقاتلوا ويكاسروا بعض ويقلو الراكب للشوفير (مبارح طلعت من نفس المكان بنص الأجرة؟؟) لحتى يقتنع واحد منهم بسعر التاني، أو إذا ما حدد الشوفير أجرة بيقلو عدّاد ونص، أما أنو يطلع الراكب عالعداد فهاد أمر انقرض بحمص (خيو ما بدنا نظلم الشوفيرية يمكن ما بيعرفوا يستخدموا العداد؟؟)..

هلأ إذا انحلت هالأزمات وطلع مع الشوفير هون بتبلش النقاشات البناءة والحوارات الهامة واللي هي بتختلف حسب نوع الراكب والشوفير:
1-ممكن يتناقشوا عالأغنية اللي حاططها الشوفير وعن المطرب اللي عم يغنيها؟
2-ممكن يبلش الشوفير بالشكوة عالوضع والأجرة والبنزين وهاد إذا كان متخانق عالأجرة مع الراكب مشان يبرر موقفو؟
3-ممكن يتناقشوا بالسياسة وآخر المستجدات اللي عالساحة أويبلشوا بشي صراع عقائدي؟؟
4-إذا كنت رايح ع محل محدد بيبلش الشوفير بيطالعلك كل أهل هالمحل بيعرفهم وبيبلش يسألك عن أشخاص بحياتك مانك سمعان فيهم ع أساس كلهم خادمين معو بالجيش، بس بدك تسايرو؟؟
5-بيجيك شوفير كان بزمانو عتال أو شوفير سوزوكي وبيبلش يحكيلك قصة حياتو وبيناقشك بمواضيع أرقاها بيكون عن الكرامة وبتبلش تنزل ع سوق الهال..
6-أو بيجيلك شي شب خريج جامعة أدب انكليزي أو هندسة أو علم نفس ومانو ملاقي غير هالشغل وكمان بيبلش يحكيلك عن قصة حياتو إو بتترقى النقاشات عن شي موضوع بناء أو هيك شي..؟

مبارح بدمشق طلعت مع شوفير تكسي صرلو نهارين بالمصلحة كان قبلها شوفير سرفيس عالدويلعة وإذ بيقللي (اتمسك!!) وبلش التخزيق بين هالسيارات مفكر حالو عم يسوق سرفيس وإذا ماني غلطان من حكيو يا سكرجي يا محشش؟؟ وشوف المغامرات يا أبو الشباب..؟؟

هلأ هوي فيه إسا أنواع شوفيرية غير بس حاج هدول..

وانت بالتكسي بتبلش عندك أزمة المرور يعني بيكون الشوفير آخد الشهادة بالغلط وبيبلش يستعرض معلميتو بالسواقة وبيروح يفوت بشي ألفين سيارة أو بيمشي بعكس السير بحجة أنو بدو يختصرلك الطريق وإنت هون بتبلش تقلب معدتك من التخميس والتشفيط شيلك عن حط حزام الأمان والمخالفات والأخ عبدلله كفى ووفّى بهالقضية..

يالله يا شباب المهم نوصل ع خير عالبيت والحمدلله عالسلامة..

يتبع...
__________________
I Believe In SYRIA..
رد مع اقتباس
  #8  
قديم 15th July 2008, 06:11 PM
الصورة الرمزية ابن الحياة
ابن الحياة ابن الحياة غير متواجد حالياً
عضو بارز
 
تاريخ التسجيل: Jul 2007
الدولة: سـوريا المقدّسة
المشاركات: 148
الجنس: ذكر
ابن الحياة is on a distinguished road
تعلّم الانكليزية دون معلم عالطريقة الحمصية..

وصلتني هالرسالة عالإيميل وضحكتني بشي ست مية ألف..هههههههه.. بصراحة هي وصلتني عنوانها (حموي يتكلم الانكليزية) بس أنا لزقتها بالحماصنة مشان حطها هون..

مصطلحات حمصية مؤكلزة!!


What in not in?
شوفي مافي
Danger on my mind
خطر على بالي
Your price on me
حقك علي
Why after my age
ليش يابعد عمري
Divorced salad
السلطة المطلقة
Two husbands of socks
جوزين جرابات
He is my mother
إنه أمي - جاهل

Keep it on my mathematics
خليها على حسابي

Constitution home parents
دستور يا أهل الدار
Evaluate my envelopes
قدر ظروفي
After your ear
بعد اذنك
Shave from here
احلق من هون
Don't calculate my calculation
لا تحسب حسابي
She went on you
راحت عليك

Cover on your wide
يستر على عرضك

I push the mathematics
أنا أدفع الحساب
Not on your each other
مالك على بعضك

أما الآن أسماء بعض الأكلات أيضا:
Kissers
مقبلات

Upside down
مقلوبة
Husband figs
تين بعل
Hinds Husband
جوز هند
Orange with picture
برتقالة معصورة

Made in husband
معمول بالجوز

كلمات اخرى:
Like an elephant
كفيل

He does not die to me an onion
لا يمت لي بصلة
I never escaped a cat
لم أهرب قط
To be kissed
يتقبل
Cairo envelopes
ظروف قاهرة
Vomit office
مكتب المراجعات

Father of beautiful
أبو جميل


انشالله تكون عجبتكم..

يتبع...
__________________
I Believe In SYRIA..
رد مع اقتباس
  #9  
قديم 18th July 2008, 12:21 AM
abode durra abode durra غير متواجد حالياً
عضو مخضرم
 
تاريخ التسجيل: Nov 2005
الدولة: LA, Zaidal
المشاركات: 208
الجنس: ذكر
abode durra is on a distinguished road
يعني يا يوسف بدك evaluate my envalops وو اني بتاسف على التاخير بس عنجد شي بجنن

و ذكرتني مرة قبل ما نجي لهون كني بالشام رايحين على السفارة الامريكية و طلعنا مع تكسي و بلش يضربلك معارف و عا شي كان بيعرف القنصل اول السفير هههههههههههههه

شكرا من جديد
__________________
عبودي الصغير

Young Abodi
Zaidal-California
رد مع اقتباس
إضافة رد

أدوات الموضوع
انواع عرض الموضوع تقييم هذا الموضوع
تقييم هذا الموضوع:

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


Sponsored Links

جميع الأوقات بتوقيت GMT +3. الساعة الآن 07:01 AM.


Powered by vBulletin V3.6.2. Copyright ©2000 - 2022
تصميم الموقع وسام عبد العزيز جميع الحقوق محفوظة, Copyright ©2001 - 2022
المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص